新屯門中心啱啱有個銀主盤成咗，成交價只得五十五萬，呎價一千蚊有找，買家係近排大家都好敬重嘅醫護人員。
美聯物業啟豐分行助理區域經理吳英傑對蘭西講，呢名醫護人員嘅工作性質，唔係直接照顧非典型肺炎病患者，今次搵樓，係想一個人住。
位買家喺3月底開始搵樓，最初想買近碼頭區單位，後尾至擴大到區內其他樓盤，先後睇咗差唔多20個盤，咁啱呢個新屯門中心單位，銀主肯降低叫價，所以睇咗兩次就決定買嘞。吳英傑指出，個單位五百五十五呎，呎價九百九十一蚊，係近期嘅低位。近排個市好番啲，估計該屋苑呎價有機會升番3到5%。
吳英傑話，銀行畀美記放售呢個單位，都有幾個月，原本心目中價錢係60幾萬，有客出到60萬都唔賣，點知個市畀肺炎搞成咁，惟有降低叫價。
長實新盤瞄準舊區換樓客，大角嘴凱帆軒上個禮拜就搞咗個「洗樓行動」，由各大地產代理行去啲舊區推廣，高級營業經理黃思聰就話，洗樓嘅安排，令售樓處可以keep住一定嘅人流，多咗唔少新客睇樓，佢重話四間地產代理行每日派成七百人去洗樓。
為招攬呢班舊區客，長實噚日專登開咗幾條新嘅穿梭巴士線，包括太古城、九龍灣同北角等，發展商話，噚日單日就有千七人搭接駁巴士睇樓。洗樓成功，各大經紀功不可沒，今日會頒獎畀做得最好嘅代理行。
噚日佛誕假期，新地售樓部一眾要員馬不停蹄巡盤，據可靠線報，集團副主席郭炳聯，上晝聯同雷霆及周國賢等，先到屯門愛琴海岸巡視，食完晏後，再往東涌海堤灣畔。業務部副總經理嚴道傑話：「老細假期都要巡盤，做細嘅點可以偷懶！」
九龍灣自從成為非典型肺炎重災區後，整個社區變得水盡鵝飛，但地鐵搞嘅優惠，就令九龍灣德福廣場噚日出現打蛇餅、迫爆場嘅情景。
地鐵禮拜二宣布，策動港人消費計劃，5月底前喺德福廣場、杏花新城、青衣城同綠楊坊，購物滿五百蚊，可獲贈一百蚊購物券。地鐵物業管理高級商場市務經理陳嘉明話，每日名額各一千個，但噚日嘅名額喺四個幾鐘頭內換晒嘞。
買樓呢啲咁重要嘅決定，唔少人都想知道個單位利唔利自己，最近就有位篤信風水嘅買家，搵埋師傅睇過幾個新盤，最後買入長實畢架山一號。
香港置業何文田九龍豪宅區域經理葉展均話，個客對風水已好有研究，但都搵多位城中出名風水師一齊去地盤，先後睇咗兩次，最後買咗3座低層C室四房單位，1488方呎，購入價830萬。
葉展均講，個客揀畢山係因為有畢架山做「靠山」，行緊地運，最重要係夾佢嘅命格喎。
新買家住開何文田山，喺九龍站都有物業投資，聽講有意再買多個畢山細單位嚟收租。
蘭西
電郵地址：
