好快會喺全球上畫嘅《22世紀殺人網絡2決戰未來》，前日喺荷李活舉行首映禮，當日嘅出席嘉賓粒粒都係星，認真夠睇頭。不過我羅拉喺人群之中，竟然發現好耐都冇露面嘅日本天后宇多田光，當日光妹一身成熟打扮，簡直令人眼前一亮！
自從光妹舊年割除腫瘤之後，瘦到成個人都落晒形，之不過佢嫁咗畀攝影師紀里谷和明之後，又變咗做一個肥嘟嘟嘅師奶仔，認真慘不忍睹。到咗前日，年僅二十歲嘅光妹喺首映入面，以低胸長裙加高踭鞋現身，增添咗唔少女人味，呢個成熟look認真少見。
查實光妹前日出席《22世紀》嘅首映禮，爭取多啲曝光機會，識番幾個荷李活friend，對佢打入美國市場絕對有幫助。但係光妹喺美國真正有幾多人識呢？又真係令人懷疑。事關前日路透社竟然將光妹寫成「Japan'snumberonepopsingerAiko」，將佢同矇豬眼嘅Aiko撈亂，我諗光妹知道後，一定好hurt！