今年五一及佛誕假期都在星期四，攔腰斬斷港股交易日，對短線炒家認真唔方便，趙飛雲同唔少老友都係周三離場，而周五假期前通常唔會入市，變成睇多過做。唔知係咪97年後香港經濟轉差，搵極都唔夠使，成日都覺得香港假期太多。事實上，對比其他歐美先進國家，香港股市假期似乎較多。
港股周三先跌後升，加上成交回升近88億，望落有轉強迹象。不過睇真啲，港股微升11點，全靠滙豐（005）1隻撐住，其他藍籌普遍回吐，成交增加則主要有多隻股份配售上板，並非表面睇嚟咁樂觀。
外圍美股仍未明朗，周二破位，周三回落。納指仍受制去年12月頂部1521，杜指則在三角形頂部8520之上橫行。昨日外圍美股期指偏軟，可能破位唔成，先出現較大回吐。
如果係咁，港股今日料會跟隨跌穿50日線（現處8850），向下考驗10及20日線支持。早前未有及時上車的讀者，可觀望8700至8670的支持力，若守得穩，可伺機買入恒指Call輪9723或9767。
港股在8700附近先行整固，有利後市進一步上試9300阻力。正如之前提過，若在8700附近買入恒指Call輪，就算升至9200受阻亦不致太乏味。恒指若確認跌穿8640，則可能係另一個故事，恒指Call輪跌穿8570宜先止蝕，反手買Put輪。
趙飛雲