現在經營食店，「為到本」已經要還神，但仍然有人甘願冒險，認為這才是商機，希望藉此殺出一條新血路。從事保險業十多年嘅曹小姐，決定暫時將業務交給朋友管理，接了上手同樣經營泰國菜的食店，決定一嘗當老闆的滋味，甫開檔四個月，連裝修共蝕過百萬，今個月終有起色！
記者：何善華
攝影：陳智良
老闆話「沙士」對店舖無絲毫影響，反而多咗食客，原來唔少食客都覺得，泰國辣味有殺菌作用。
曹小姐話，間舖頭用咗15萬接手，頭三個月蝕足13萬，其後決定停業一個月，再使一百萬全新裝修，正式結束上一代泰國菜館13年的格局模式。煥然一新確是帶來朝氣，剛於四月重開店舖後，人流絡繹不絕，今個月開始賺錢。老闆話做生意一定有輸有贏，實賺嘅就唔係生意。
自認泰國癡嘅曹小姐對凡是泰國東西都特別喜愛，每個月會抽出四至五日去泰國度假。舖頭亦奉行泰國正宗口味，以辣為主，因此亦吸引不少泰國人到訪。她認為泰國食品味道濃郁，辣味能增強胃酸，而香料亦可令食慾大增，偶爾加上香茅汁、椰汁或香草等配料，係食客幫襯的原動力。
店舖裝修雖已面目全非，但曹小姐依舊僱用上手留下來的廚師，清一色為泰國人。曹小姐盛讚已當了十多年總廚的MrSamang，認為他對食物要求一絲不苟，又肯花時間鑽研不同菜式，例如今個月面世的新菜式「咖喱蒸蟹」便是由MrSamang親自研製，全港獨家。此外，店內的「榴槤燉雞」是由老闆親自研究的。
經歷兩代泰國菜館的總廚Mr.Samang，平時喜歡研究新穎菜式，對不時轉換口味的食客來說實是一件賞心樂事。
大廚在一次機緣巧合下發現燉二十個鐘頭才令榴槤的「攻」鼻味減退，但仍保留淡淡榴槤的餘香，雖然食客品嘗時會嗅到一陣陣的榴槤味，清香的雞湯味卻使人欲拒還迎。
食客Ivy：最鍾意呢度嘅榴槤燉雞，榴槤味唔係好強，入口之後又會慢慢散發清甜嘅味道！
先將雞翼起骨，然後再釀糯米，經慢火蒸熟糯米後再炸一輪，先會做出雞翼皮脆而肉嫩的效果，而且很足料。
葉小朋友：卜卜脆嘅雞翼，好好食！
老闆堅持用新鮮海蟹，並由總廚Samang親自研製的泰國咖喱拼合而成，今個月正式在店內面世，最特別之處是以蒸蟹形式推出，只此一家。
泰中意正宗泰國料理
地址：旺角通菜街146號C舖
電話：29920000
營業時間：11:00am-12:00mn