自從非典型肺炎襲港，社會上一眾貧窮長者被迫深居簡出，生活倍感孤苦。蘋果日報慈善基金現展開「蘋果愛心糭子2003」募捐行動，盼各界善長慷慨捐款支持，透過義工上門送贈愛心糭子，好讓一群無依長者驅走沙士（SARS）悶氣，歡度端陽佳節。
七十七歲的謝婆婆，獨居於唐樓板間房，生活捉襟見肘。她對到訪記者及社工坦言﹕「我一日兩餐好簡單，通常蒸隻蛋或者煮條青菜送飯。我唔會自己買糭食，每月慳埋啲錢都已經攞晒去睇中醫。」
白髮蒼蒼的謝婆婆，近年飽受頭痛及胃病折磨，苦不堪言。「我細個曾經喺一樓跌落地，跌傷個頭，搞到老咗成日頭暈同頭痛，食西藥冇效，重令到個胃好容易唔舒服，惟有不斷服中藥，飲咗藥個人至舒服啲。」
謝婆婆說，她晚年靠領綜援金維持生計，平日最大娛樂是到社區中心與其他長者聊天，以解寂寥。「呢排驚咗肺炎，自己精神又麻麻，至少咗參加中心啲小組活動。𠵱家你哋嚟探我，我好開心。」
另外兩位年近七旬的綜援長者蘇伯夫婦，同樣體弱多病，生活清貧、儉樸。「每逢落雨同轉天氣，蘇伯就腳痛到成晚瞓唔着，我亦周身唔舒服，腰骨同膊頭特別痠軟，我哋要不斷貼膠布、搽藥油嚟止痛，真係唔食飯都要買風濕藥！」蘇伯妻子伍婆婆輕歎道。
蘇伯大半生從事地盤搭棚工人，養活妻兒，近年因年紀老邁被迫退休，與妻子倚靠微薄綜援金過活。「年紀大，重邊有人請我做嘢！呢幾年我風濕痛得咁犀利，梗係因為以前搭棚跌得多！」蘇伯訴說。其兩名子女因在港難以覓職，一直長居內地，無力供養父母。
「中心社工好關心我哋，舊年端午節重有義工上門派糭畀我同蘇伯過節，真多謝！」伍婆婆由衷表示。
為關顧這群老弱，蘋果基金現正接受讀者捐款，盼集腋成裘，資助多間非牟利社會服務機構（見表）舉行端陽贈糭活動，讓一眾貧苦長者在非典型肺炎威嚇下，也能感受到社會人士的愛心與關懷。
「蘋果愛心糭子2003專戶」捐款編號：C0555
暖流熱線
電話：29908688
傳真：23702192
電郵：
網址：
