呢個世界，有人冇嘢做，有人做到嘔，有人想幫手亦苦無途徑嘅荒謬情況，日日都有。好似單沙士咁，醫管局日日話唔夠人手，要停急症服務，又話叫停門診要病人遲吓先覆診。
見到咁嘅情景，真係令人好唔舒服；一班資深私家醫生企出嚟話可以幫手，提供義診服務，畀一班睇開公立醫生嘅病人轉介去佢哋度，醫生唔收診金，藥費則自付。
聽講由四月下旬計劃推出，已經有七十位醫生參加咗義診計劃，但冇乜人幫襯，咁耐都唔夠二十單。
八方問西醫公會主席楊超發何解，係咪政府宣傳不力呢？佢老哥話唔知道，但係就肯定問題好大，皆因當中唔少病人係長期病患者，佢哋冇醫生睇，自己去藥房配藥食，「咁好危險。」
楊醫生聲明佢唔係眼紅啲藥房好生意，但係有病要睇醫生。對政府轉過嚟嘅病人，佢哋會特別收平啲，一啲小手術好似為駁骨病人拔針，都收好平，洗腎都平啲。
沙士搞到行行死晒，醫務所變成高危區，班私家醫生都諗緊點自救，發明咗有「耳朵」嘅電筒後，楊醫生研究緊喺醫務所裝紫外光殺菌，睇吓有冇用，如果啲病人都係唔返嚟，睇怕醫生都要上街叫董特首打救埋佢哋。
（圖）西醫公會主席楊超發話有病真係要睇醫生，唔好亂咁「自醫」。
傳真︰2623-9278
電郵︰