港股連續3日喺8800上下浮沉，估計暫時要消化一下，進取嘅做法係揸些少Put輪，不過最好暫時唔做嘢住，等個市跌百零點時趁低買Call輪搵食。吼大市回落買Call輪，最直接做法係向恒指Call輪埋手，對象有3件，就係9723、9750同9809。
吼低買藍籌Call輪，和黃Call輪9606同9811數據吸引。9606兩個幾月後到期，現價48.5仙，溢價得0.3%，槓桿率9.2倍，咁低溢價，係預咗正股（013）下周二除息1.22元因素，計埋股息因素，隻輪溢價實際係3%。除息令正股調整，到時趁低買貨。另一件9811係封頂輪，封頂價50元，距正股現價重有近12%，10月到期，現價30.5仙，溢價3%，槓桿率14.7倍。9606同9811都比較實際，以前場面熱鬧嘅9666，由於槓桿率高達70倍，重有個幾月命仔，波動必定有如過山車，唔貼市者唔適宜玩。
中移動Call輪呢排溢價縮晒，留意中移動（941），吼住回落幾格時買佢嘅Call輪。例牌對象係9773，9月到期，現價21.3仙，溢價5.1%，槓桿率7.7倍；其次9770，同月夠鐘，現價23.1仙，溢價5.5%，槓桿率7.1倍。中移動現價偏低，中長線走勢向上，若見回軟低買Call輪，贏面應該大過輸面。
章盛