這個母親節，Wasabi早就為媽媽安排了好節目，參加了近期大熱的本地一日遊旅行團，團費加埋小費都唔使一百蚊一位，兼包一頓海鮮餐，絕對抵玩。不過講到最筍，當然是可以藉住今次參加本地團，再加埋其他本地消費的單據，儲夠$1,000消費額，就可換張平機票。慶祝母親節之餘，亦支持留港消費，更可以順道換埋平機票，一舉幾得。
記者：招佩珊、梁佩芬
攝影：梁細權
Model：阿媽、Wasabi、家健
行程的第一個目的地是天水圍的「水澤田園」。這個田園有齊燒烤、水上單車、釣魚塘、風箏、足底按摩健康徑。Wasabi同細佬就先租架四輪單車載媽咪遊「園」一周，欣賞風景之餘，又睇睇邊樣活動最好玩。最後大家決定打迷你高爾夫球，皆因媽咪未打過Golf，慶祝母親節就必然是先為阿媽着想。睇見媽咪愈打愈開心，證明是個正確選擇。不過，行程相當緊密，打完Golf，買了支蘋果蜜潤潤喉，就要向第二站流浮山進發。
流浮山出名食海鮮，雖然成圍菜只有清蒸魚同白灼蝦這兩味海鮮，其餘都是一般家常小炒，但魚同蝦勝在夠新鮮，媽咪這個一家之「煮」都覺得味道唔錯。
食飽飽跟住去附近的海味街，媽咪話這裏的海味新鮮生曬，平時響街市未必買得到，於是大手掃貨，無非都是為了煮餐最美味的餸菜給仔女食，母愛的確偉大。
去到大埔林村許願樹，當然要許番個願，於是每人都買了一個寶牒，然後在上面寫上願望，點許願？當然唔使人教啦！3個人使勁將寶牒拋上樹，結果當然是氣力較大的細佬拋得最高。意外收穫係，竟然俾饞嘴的Wasabi響林村發掘出多款美味小食，有勁辣魚蛋、豆腐花，還有小時候最愛的餅乾夾麥芽糖。
全程的最後一站，是到紅磡一間售賣金飾的店舖睇真金人像，這本來是國內遊客必到的景點，但對金飾無甚興趣的Wasabi同細佬就覺得有點悶，不過，兩姐弟睇到個真金洗手間，都大呼騎呢有趣。到了近黃昏，旅遊巴便載團員返回集合地點解散。至於Wasabi的慶祝母親節活動當然重未完，接着便是帶媽咪食自助晚餐，當然還有點私心了，因為這天一家的團費加起來，也不足以換平價機票嘛。
水澤田園、林村許願樹、海味一條街、流浮山海鮮一天團
團費（每位）：$58（平日）、$78（假日）、另加小費$20
查詢：關鍵旅遊（23622022）
一家三口於假日參加這個本地團連小費合共$294（$98×3），只要夜晚帶埋媽咪去貼有「同心為香港」標誌的食肆食夠$706，就剛剛使夠$1,000有資格去換平機票。
只要在5月份內於本地的旅遊公司、酒店、食肆或零售商店消費，搭的士及睇戲都得，總之消費滿$1,000，就可以憑收據向航空公司換取機票換購券，然後憑券到旅行社預訂機票（需繳付$100手續費），不過，這$1,000的消費亦有一些限制：
$1,000消費額當中，必須包括由香港旅遊業議會註冊旅行社籌辦的本地觀光團或本地酒店套票。零售商店的消費額最多只能佔$300，食肆的消費額則沒有限制。
唔好以為落街食碗雲吞麵拎張單就叫做消費，要到貼上「同心為香港」標誌的商戶才算數，要知邊間有份，可以上網Check或打電話問。
國泰航空推出的二千張特惠機票，大部份已經響5月頭唔夠一個星期內被換完，國泰亦宣布再加推500張，另外，亦有不少航空公司陸續推出特惠機票，不過數量有限，總之，手快有手慢無。
查詢詳情及下載標誌網址：
查詢熱線：1836168
連以辦日本團為主的東瀛遊近期亦有辦本地團，平價之選就有這個遊回歸紀念塔、吐露港、林村許願樹、黃金海岸等地方的一天團。
查詢：東瀛遊（23152000）
換機票計一計：$444（團費加小費$148×3）+$556（其他消費）
人多才有着數，否則要湊夠一千元都頗傷腦筋。
坐旅行社安排的專船遊南丫島各個海灣，勝在唔使為搵船搭而大費周章，更包一餐響南丫島食海鮮午餐。查詢：專業旅運（28453232）
換機票計一計：$894（團費$298×3）+$106（其他消費）
團費不算平，小家庭都很易夠數。
這個遊西貢蕉坑農科研究中心、於「海上遊洋紫荊號」船上食自助晚餐，以及入住一晚紅磡海逸酒店的本地團，加埋小費每位收$479，即合共$1,437，毋須再另行消費已經夠數。
查詢：康泰旅遊（21088888）
換機票計一計：$1,437（團費加小費$479×3）+$0（其他消費）
玩豪啲，自然一次過夠晒數。