前晚收費台同時間播兩場波：一場係AC對國米嘅歐冠盃四強大戰，另一場就係阿仙奴對修咸頓嘅英超聯例行公事；賽前相信好多球迷都會揀睇前者，事關戲碼強啲同埋競賽意義大啲，但係我求大俠睇睇吓就揀定後者。點解？之唔係阿仙奴對修咸頓多波入囉。
我求大俠起初都擔心阿仙奴同修咸頓啲球員會揸流攤，但睇到佢哋可以喺四十五分鐘就炮製咗六個入球出嚟，就知自己估錯咗。阿仙奴就算贏輸，都唔會影響佢哋嘅排名，但係難得佢哋班球員重好落力比賽，幾位主將如皮利斯同亨利更直頭當有競賽意義嘅賽事咁踢，場波重有幾個靚入球，事前真係始料不及。
好彩阿仙奴場波半場大局已定，相信好多球迷都會轉番睇米蘭打吡呢場悶波，歐冠盃直播搞成咁，唉……！
俾拉科借去奧地利維也納嘅巴西中場查明夏人衰行路打倒退，佢喺禮拜三睇完皇馬對祖記歐冠盃大戰後，走去馬德里機場，忙中唔見咗機票，佢話趕時間硬闖上機，結果同機場人員糾纏；據報佢打到人哋個鼻骨裂，重俾人拉咗。我求大俠對佢劣行唔感意外，因為佢喺拉科時襲擊過教練艾路列達，咁躁嘅人，隨時同人講手真係唔奇。
早幾日我求大俠咪講過蘇超聯嘅些路迪個勢似足英超嘅曼聯，隨時有機會後來居上，結果些路迪真係喺星期三嘅蘇超聯以四比○擊敗馬瑟韋爾，雖然同流浪同分，但以較佳得失球升上榜首，連博彩公司都將些路迪列為一點七三倍嘅奪標大熱。如果些路迪真係成功衞冕同攞埋歐洲足協盃做「雙料冠軍」，就真係一時佳話喇！
由馬圖斯執教嘅塞爾維亞及黑山國內勁旅柏迪遜，日前成功衞冕聯賽冠軍，睇嚟呢位前德國國腳，做球員或做教練都掂咁喎！但係我求大俠知道柏迪遜呢幾年喺國內算係超班，可能換咗第二個教都有同樣結果，始終馬圖斯之前教奧地利維也納迅速時成績麻麻，係咪有做教練嘅潛質？睇埋佢哋來季喺歐冠盃外圍賽打成點先講啦！
湖人中鋒奧尼爾喺噚日NBA季後賽，俾馬刺大炒嗰場波第二節射罰球嗰陣，有位馬刺球迷竟然攞住張三點式女郎海報對住佢，諗住擾亂佢嘅集中力，點知呢位中鋒兩射中一，即係同佢平時命中率差唔多，個位「屎橋」球迷更加俾保安押離場，連波都冇得睇，真係捉雞唔到蝕揸米囉！