薛家燕（好姨）早前應出版社邀請，出版咗一本兒童漫畫，好姨喺漫畫入面嘅「家燕媽媽」形象健康，幾受小朋友歡迎。
有間近年一直生產廸士尼卡通人物兒童用品嘅公司，最近買咗「家燕媽媽」嘅卡通肖像權，用好姨嘅Q版肖像生產一系列嘅咕𠱸，準備喺後日母親節推出，但係因為受非典型肺炎影響，呢批咕𠱸要延遲到下個月先有得賣。
好姨噚日喺荔枝角接受訪問時話：「『家燕媽媽』個英文名係『MotherHongKong』，都可以代表香港，雖然巿面重未有得賣，但為咗配合母親節，我會喺嗰日攞一批咕𠱸出嚟，捐畀受SARS影響冇咗親人嘅小朋友，希望可以畀小朋友一份溫暖。」好姨咁有愛心，抵佢咁受fans歡迎，唔知佢啲仔女點同佢慶祝呢？
滕麗名噚日喺烏溪沙拍攝無綫新劇《非常外父》外景，現場有專人教佢拉二胡，但係馮仁昭見佢拉到雞手鴨腳。阿滕都承認自己成日撞板，拍呢套劇以嚟，已經幾次令拍檔鄭少秋（秋官）受傷，所以連秋官都幫佢起咗個花名「黑旋風」。阿滕唔單止唔嬲，重話秋官好風趣，睇嚟呢啲就係秋官嘅魅力喇！
蘇永康知道咗去台灣要隔離十日之後，早排一直延遲留台宣傳活動嘅歸期，足足留咗喺台灣三個星期，重喺拍劇個陣，唔小心扭傷腳，認真運滯！向來孝順嘅康仔，話會趕喺母親節前返港，佢日前話：「呢兩年同台灣好有緣，舊年想去台灣做嘢，但係去唔到，之後攞到工作證，但係就有SARS，唔可以輕易返港。我好想喺母親節返到香港同媽咪食飯，而且梅姐（梅艷芳）想我出席佢嘅演唱會記招。」
江華同麥浚龍噚日去奧海城，出席「信和商戶心連心之奧海城開倉大行動」。江華話老婆麥潔文將會做纖體公司嘅代言人，問佢准唔准老婆以三點式示人？佢話：「唔一定要着三點式，老實講，老婆梗係自己睇好好哋，而且佢已為人妻、人母，露肉唔係太好。」江華重話麥潔文問佢收咗身似唔似二十幾歲，江華話：「真係攞膽，不過佢成績真係幾好。」
恬妞噚日喺將軍澳電視廣播城錄影「修身堂」特輯，恬妞話自從上年收身成功之後，工作量大增，所以今次再續約冇加人工都冇所謂，問佢𠵱家係咪多咗狂蜂浪蝶？佢話：「我之前喺內地嘅山上面困咗幾個月，見嘅都係怪獸，所以食齋！」問佢有冇打電話恭喜前夫萬梓良（萬子）添丁？佢話：「我會打電話恭喜佢，重會送減肥禮券畀佢太太。」
