萬綺雯早年患有情緒病，常常因為下雨而感到沮喪，自閉在家中。但自從跟編劇夫婿陳十三結婚後，因為婚姻生活愉快，而且兩夫婦遇有問題都必定共同面對和解決，所以萬綺雯的情緒病亦得以不藥而愈。
萬綺雯和編劇夫婿陳十三已結婚三年，二人感情穩定，萬綺雯表示幸福的婚姻，更把她過往的情緒病治愈。
萬綺雯認為三年的幸福婚姻，令她在生活上有很大轉變，萬綺雯說：「我以前有情緒病，每次落雨都會屈埋喺屋企好唔開心，新婚冇幾耐，有一次老公見到咁嘅情況，佢好關心咁問我：『落雨啫，你使唔使咁憂鬱。』老公開解我，令我終於開竅，𠵱家落雨都唔關我事囉。」
萬綺雯明白夫妻之間互相扶持是維繫彼此感情的好方法，她說：「有另一半一齊去諗問題，大家一齊去解決係好嘅，相對嚟講，我以前一個人去面對問題，太大壓力啦。」
萬綺雯三月底已跟亞視約滿，她在拍完亞視劇集《萬家燈火》後，還未有跟公司傾談續新約問題，萬綺雯說：「我近年都係同公司簽部頭合約，因為拍完一套劇，我都鍾意去外地旅行唞吓，充電之後再拍劇會更投入角色。」
趁着這段休息的空檔，問萬綺雯可會和夫婿製造愛情結晶品。
萬綺雯說：「我同老公有共識，暫時都唔會要小朋友住，𠵱家非典型肺炎好犀利，時勢又唔好，好似好亂咁，我哋覺得唔應該喺呢個時候帶小生命嚟呢個世界。況且，我同老公都好享受二人世界。」
採訪：比華利 攝影：陳慧安 協力：羅慧敏
服裝：SistyrMoon
髮型、化妝：李倩雯（TouchUp）
