眼鏡股泰興光學（389）自從公布業績之後，股價走勢靚絕，一舉突破橫行好耐嘅3.20至3.30元橫行區，甚至一度抽上3.70元，好似在港搞到翻天覆地嘅沙士，對佢完全冇影響。
泰興股價走勢咁強，小初以為泰興將有好消息公布，但經紀黃話唔係，有新搞手加入先至係真。
經紀黃話，泰興一直以來有位高人睇住，但就冇乜點大搞，直至早一排，受到一間近年掂親邊隻二三線工業股都會急升嘅英資大行垂青，加入買貨行列之後，泰興無論股價同埋成交量都恍如脫胎換骨。
呢間英資行之前嘅戰績，有立信工業（641）同埋冠華國際（539），呢兩隻股過去半年表現如何，大家不妨作為參考。
另外，小初又想提一提華人置業（127），早排市場盛傳佢會私有化，股價曾升個唔停，但年輕賓架早已作出質疑，加上今次華置老闆亦在高位減持，私有化希望更加渺茫。
慕容小初