喺機舖長紅嘅SEGA大作《頭文字D》，會喺6月26日推出PS2版，相信一定打崩頭，遊戲除咗街機模式外，亦加咗好多家用機先有嘅故事模式，而專用軚盤亦會同時推出，唔想喺機舖跟機等到儍，又或者出街日搶唔到貨就最好預訂喇，遊戲行貨定價$342，水貨日版約$400左右，同日PS2亦會有光榮隻《三國志戰記2》同《半熟英雄對3D》推出。
今個月22日上畫嘅電影《TheMatrixReloaded》（廿二世紀殺人網絡2：決戰未來），相信好多人都等到頸都長，但係Matrix嘅Fans要留意，除咗電影之外，遊戲界3部主機XBOX、PS2、GAMECUBE亦會同步推出電視遊戲《ENTERTHEMATRIX》，遊戲耗資二千萬美元，可謂全球遊戲史上成本最龐大之製作，由《TheMatrix》電影系列編劇兼導演華卓斯基兄弟執導和撰寫劇情，香港著名武術指導袁和平亦有參與。XBOX版本有行貨同步推出，遊戲定價$299，特別版附送Matrix手表都只係$349，有興趣不妨昅實。
估唔到未到E3遊戲展，任天堂GC已經靜靜地降咗價，最新街價就$1,300左右，兼且重有遊戲送，真係單買機玩《BioHazard》系列都抵，如果你重未買GC，就真係要諗諗。喺日本超級搶手嘅GBASP就跌到底價$820-$830左右，呢部機靚仔又細部，新近勁Game有《封印之劍》同《惡魔城~曉月之圓舞曲》等。
文：打機鐵人