雖然港股假前傳出大戶齊齊出貨套現消息，但港股周三總算企得穩，恒指升11點，收報8901。收市後，美資大行花旗美邦更大力唱好港股，相信在6個月內，恒指會重上10000。
近期本港經濟的不利消息一浪接一浪，大行唱好港股之聲，差不多已成為絕響。花旗美邦如此高調唱好港股，令阿虎精神為之一振。ｅ莉莎話，可能近期外資大行唱淡香港已經唱到悶，加上大戶資金真係冇乜出路，惟有流入證券市場搵食。換言之，港股後市走勢可能要睇游資力度，唔係單單睇經濟是否復甦。金源投資（310）早前停牌，打算併股及供股，計劃集資3240萬元，據聞亦係想集資炒港股。不過，周三復牌，股價即乾跌44.44%，收報0.015元。
高寶綠色（274）完成配售，周三復牌即遭拋售，股價急挫11.36%，跌破配售價1.28元，收報1.17元，成交金額高達3.1億元。
黑客話，據聞今次負責配售嘅代理，將貨源配到好分散，唔似裕元（551）淨係配畀少數策略性投資者，而且好多接貨者只係畀面認購，股份周三復牌，即刻掟貨套現，令到隻股秩序失控。最近大市唔算好旺，新股上市或配股後的走勢，好視乎有冇莊家肯圍飛，但最近港交所（388）盯得好緊，更一度出信畀包銷商唔好配股畀某某莊家，所以近排聽到股仔配股消息要小心。
市場繼續尋寶，大炒私有化概念股，其中香港興業（480）再升17%至1.70元，同系的興勝創建（896）更勁升27%，收0.28元。另外，大昌集團（088）升13.67%，力寶華潤（156）升22%，而且兩股成交唔弱。
阿虎