日本男星窪塚洋介，近日精心部署的生日出書兼奉子成婚「大四喜」計劃，埋門一腳居然撻Q！
前日是窪塚的二十四歲生日，他刻意選擇當日公開與二十歲Reggae舞蹈員NON結婚的消息，嚇fans一跳。就在窪塚生日當晚，他與未婚妻施施然到東京內某區役所，欲遞交結婚申請書，其實窪塚一個月前就已經知道女友NON有了身孕，但因為希望一嘗生日註冊結婚的滋味，故縱使前日在日本曆法中是不吉利之日，窪塚一樣「冇有怕」。
可惜，在區役所前等候了五分鐘的記者，只見窪塚苦笑着走出來，記者向窪塚道賀，他則笑着回應說：「多謝晒！不過我帶唔齊證件，衰咗！要再搞過，哈哈哈！」原來準備註冊多時的窪塚，竟然忘了帶備戶籍證明及證婚人簽署，可謂百密一疏，但時間所限，兩人亦不可能返家取回文件，惟有在翌日補辦手續，成為真正夫妻。
而前晚窪塚在記者面前，亦處處維護着腹大便便的嬌妻，禮貌地禁止記者拍照，並說：「佢只係普通人，唔該你哋唔好影佢相，小NON，你上番車先！」此外，據悉窪塚打算在愛妻產子後，才一次過補擺婚宴與滿月酒。