恒指回升11點，變化屬於輕微，窩輪市場照樣有威水嘢亦有死火嘢，似乎死火嘢多啲。隨住時間消逝，窩輪溢價收縮，輪價下跌好應該。試吓假設1個月後，全部股票價格同昨日一樣，保證輪價全部衰過昨日。
好幾隻Call輪昨日跌幅唔細，但仍然係有再跌可能。
太ACall輪9475再試玩過山車遊戲，收1.8仙，散31%。月底到期，行使價32.88元，正股（019）昨日除息，收30.50元，兩個幾星期內有冇機會升上32.88元以上？
聯想（992）收2.175元，跌3格，Call輪9659收7.2仙，跌16%，成交勁，有94球易手，銀碼7球幾。12月到期，溢價35.7%，槓桿率30.2倍。溢價高，但唔係完全冇得炒，至緊要咪長揸，等正股回落至2元邊邊時博反彈。
中遠太平洋（1199）跌5仙，隻Call輪9658收38.5仙，跌18%，溢價8.7%，槓桿率18.3倍。溢價不斷收縮，正股又唔便宜，玩唔過。要買，等正股落到6.50元先諗。
滬杭甬（576）收2.90元，跌10仙，隻成交唔大嘅Call輪9703散19%，收0.186元。9703今年10月到期，溢價19.5%，槓桿率15.6倍。正股牛皮多一段時間嘅話，隻輪好易跌剩1半。
章盛