自由黨素來被視為「富豪商人黨」，不知民間疾苦，自由黨主席亦對不少人承認，好多貧苦、污糟嘅地方佢都未見過。如此政黨，參加直選當然冇把握，即使要民望高一啲，亦唔係容易。
哈，估唔到田北俊來一招神來之筆，第一時間回應黃毓民嘅呼籲，一日就籌到一千七百萬元（𠵱家已超過此數），成立「工商界關懷非典型肺炎受難者基金」，五月二號開始打電話籌款，五月七號就可以派錢，速度之快，可以講話冠絕全球，成為世界典範。
據田少話，籌款速度咁快，主要係財政司司長拍心口話捐款可以扣稅，阿松會同稅務局講掂，於是啲大公司捐款嚟得冇阻滯，認捐一百萬嘅公司，多過認捐二十五萬。
田少本來以為捐款者主要係大公司，點知《蘋果日報》響頭版刊出自由黨電話後，中小企東主嘅電話，多到水浸，幾乎打爆自由黨電話總機。既然咁多老闆話要捐錢，於是捐款最低限額唔係二十五萬，而係兩三萬都無拘，總之要多啲人出錢，救濟啲有需要嘅人士。
田北俊呢次徹底發揮「富豪黨」嘅絕對優勢，籌款、成立基金、派錢，一氣呵成，劍及履及，直情搶晒分，值得我哋鼓掌。呢個世界，有錢者出錢，有力者出力，歡迎出錢出力者大出風頭，旁人千祈唔好眼紅妒忌。