新地用二千萬刺激商場人流大計，令旗下商場遊人回升，五一勞動節人流比舊年同期平均有兩位數字升幅，好似沙田新城市廣場三期，主要租戶有西田百貨同玩具反斗城等，人流比舊年多六成，尖沙嘴力寶太陽廣場就多四成，其他增加近兩成嘅商場，包括新城市廣場一期、旺角新世紀廣場同上水廣場。
今個禮拜六日，新地喺旗下三個商場，包括大埔超級城、元朗廣場同置富南區廣場，會搞親親荷蘭「舞」子show活動，內容有「荷蘭街頭藝墟」同「荷蘭民族土風舞」表演。
「荷蘭街頭藝墟」安排小朋友親手摺荷蘭帽同花，等佢哋送畀媽咪表達心意，呢個活動元朗廣場率先喺禮拜六舉行，其他兩個場就係禮拜日。至於想睇「荷蘭民族土風舞」，就要禮拜六去元朗廣場，或者禮拜日去大埔超級城先有得睇。
另外，恒基今日喺將軍澳新都城中心商場舉行Shine簽名演唱會，禮拜日就有鄭中基簽名演唱會同「燃點親情顯愛心」活動。而喺旗下商場貼有特定標誌嘅商舖消費，重有折扣優惠。
祥益地產喺屯門區已經有十五年，稱得上係地膽，佢哋好注重同街坊嘅交情，所以趁母親節向區內媽咪表示感謝。
公司總裁汪敦敬話會派康乃馨畀區內嘅媽咪，原本諗住派五千支，最後決定加碼至六千支，每支要五蚊。
佢又話，希望喺呢個咁困難嘅時勢下，可以為每個家庭送上絲絲暖意，以表達共度危難嘅心意。祥益地產咁積極去維持同街坊嘅關係，能夠成為屯門區地膽代理行唔係浪得虛名。
大型發展商一向少做獨家代理，但今時唔同往日，佢哋陸續將樓盤委託代理獨家發售。好似新地咁，舊年首次將九龍城獅子石道一號交畀中原地產全權銷售後，紅磡嘅雅景軒，舊年底亦畀中原做獨家，結果賣清光。為慶祝理想銷情，噚日中原邀請新地賣樓部話事人周國賢，去分享呢個美滿成果。
中原饒富心思，準備成枱水果去慶祝，當中梗係唔少得「果王」榴槤同「果后」山竹。中原一姐劉瑛琳同新地周生揸住啲水果，十分開心。最後一姐重送咗一座水晶馬畀周生，祝新地樓盤繼續一馬當先。
至今都未有非典型肺炎個案嘅大嶼山愉景灣，發展商香港興業話，啱啱有個住喺鰂魚涌嘅客，用近二百三十萬，買咗海澄湖畔二段三十六座最後一個兩房有對流窗嘅單位，面積七百九十二呎，呎價約二千九百蚊。
原來海澄湖畔二段有對流窗嘅單位只剩八個，高座三房有三個，低座兩房有三個，一房單位就得兩個。
香港興業話，今日佛誕假期，愉景灣船隊同車隊已經預備好，等啲市民去睇完大佛，順便過嚟睇樓。
深圳名駿豪庭喺五一勞動節舉行首屆業主嘉年華會，聽樓盤代理置業國際講，當日共有三百幾個業主出席，場面墟冚；幸運兒重贏到價值萬三蚊人民幣嘅手提電腦。
另外，嘉年華當日亦賣出二十個單位，到周一為止，五日共賣咗六十五伙。
名駿豪庭位於羅湖蓮塘區，建有九幢十八及十九層高，同一幢二十八層高住宅，單位約一千五百四十個，面積約四百六十至九百二十方呎，呎價五百蚊。
蘭西
電郵地址：
