金像影后荷爾芭莉（HalleBerry）近年相當巴閉，佢主演嘅《新鐵金剛之不日殺機》同啱啱上畫嘅《變種特攻2》都有好理想嘅票房成績，而雜誌《Eve》最近搞嘅全球最美麗女性選舉，佢重以大比數拋離其他對手脫穎而出！
荷爾芭莉早排先俾《People》選為全球五十位最美麗人士之一，其實佢喺女性心目中一樣咁受歡迎，因為今次《Eve》呢個選舉係由女性讀者投票選靚女，三十四歲嘅荷爾芭莉以接近三分一嘅支持率輕鬆勝出，遠遠拋離第二位得百分之十八選票嘅嘉芙蓮薛達鍾絲（CatherineZeta-Jones）。
至於第三至第五位嘅靚女，分別係英國樂隊DuranDuran成員SimonLeBon嘅模特兒嬌妻Yasmin、珍妮花洛庇絲（JenniferLopez）以及法國殿堂級女星嘉芙蓮丹露（CatherineDeneuve）。
其實《Eve》最近搵緊一個三十歲以上嘅模特兒做佢哋雜誌今年嘅代言人，咁啱今次名列前茅嘅幾位女星都超過三十歲，唔知係事有湊巧定精心安排呢？