唔知皇馬教頭迪保斯基係咪聽到我求大俠早幾日所講，畀佢哋個前鋒摩連迪斯多啲機會，周二晚歐冠盃對祖雲達斯就用咗呢位西班牙國腳踢正選；可惜「摩記」並無好好把握呢個機會，累我求大俠跌眼鏡。
坦白講，摩連迪斯喺場波嘅表現只係中下，雖然朗拿度入嘅第一球，就係佢製造空位，但之後朗拿度投桃報李，畀返個離門六碼嘅「餐士」佢，但就無好好把握。到下半場換入新仔樸迪路，更加見到摩連迪斯同其他球員唔協調，有段時間直情隱咗形咁。
相信皇馬喺呢個禮拜聯賽作客維爾瓦時，魯爾及朗拿度都有傷，「摩記」應該會繼續踢正選，但再係踢得咁差，個位隨時畀樸迪路搶埋，到時唔好怨又要做後備殺手嘞！
繼續講皇馬對祖記場波，下半場卡洛斯個入球，惹嚟唔少人爭論；當時係有皇馬球員處於越位位置，旁證亦第一時間舉旗示意，但由於個波冇掂到任何人、包括越位嘅皇馬球員就入咗網，即係合法入球。重要拗？學下祖記後衞杜林大方啲，就連佢都話個入球冇問題！
熱刺來季踢唔到歐洲賽，決定唔再同季後約滿嘅老臣子舒寧咸續約，甚至教練等職位都唔預佢㖭。就咁睇好似不近人情，不過佢踢得最好嗰幾年都係效力曼聯，始終幫唔到熱刺攞好成績，加上喺球會有一定民望及地位，留佢喺度好可能威脅領隊荷杜嘅統軍威信。
呢個禮拜英超煞科，亦係韋斯咸為護級絕地反擊之日。佢哋除咗望作客伯明翰成功搶分，重要保頓主場對米杜士堡失分。韋斯咸前鋒簡路迪話，無論其他比賽嘅戰情係點，佢哋都唔想知，只會搏盡求勝。但有時唔係你唔想知就得，場邊球迷反應點都反映到啩。
亞視早輪直播咗場英甲森林對狼隊，之後有消息話佢哋可能直播埋升班附加賽，但之後又冇晒下文；我求大俠收到風，亞視本來諗住直播部份英甲附加賽，點知英甲到附加賽前突然獅子開大口，大幅調高直播價錢，搞到亞視諗咗一輪都未落槌，重可能唔播。講真英甲水平唔係咁高，到附加賽竟然坐地起價，真係唔要得！
網隊主將傑特喺兩年前曾因打老婆，俾警方落案控告。最近《波士頓環球報》專欄作家華恩，就喺電視上，話傑特老婆祖美娜好扮嘢，應該畀人星幾巴，結果佢被罰咗一個月人工，又禁止佢亮相任何電視同電台節目，教人打老婆，衰梗。