非典型肺炎肆虐中港台，但導演張之亮早前仍然回內地視察外景場地，上周他由北京飛赴西安時，同機有一名乘客證實染上非典型肺炎，張之亮抵西安後，隨即被公安帶走，遭強制隔離十日，現仍在隔離營中。
金像獎導演張之亮早前返內地，為即將開拍的新片尋找外景場地，他上周偕同一名製片和一名副導演，由北京乘飛機到西安繼續搵景。怎料機上有一名乘客患上非典型肺炎，結果全機搭客和機組人員需要被強制隔離，張之亮一行人亦不能幸免，西安政府規定他要隔離十日，證實沒有受感染才可以回復自由。
上周有一名西安男子在北京懷疑感染了非典型肺炎，但他並沒有就地求醫，一心想返西安治病，故該男子上周乘搭內地航班返西安時，並沒有申報自己患病。直至飛機抵西安，該名男子才急急到醫院求診，醫生證實他患上非典型肺炎，院方大為緊張，迅速通知市政府，務必找回與該男子同機的所有人，強制隔離十日。
與患者同機的張之亮與副導及製片甫抵酒店不久，即被公安及衞生人員帶走，而曾經接載過張之亮等人的包車司機，亦一併被送到西安一個郊區隔離營觀察，但據悉目前只能找回當日同機的一半乘客帶返隔離營。
張之亮被送到隔離營首天，因手機沒電，走得又匆忙，所以來不及通知家人和朋友。張之亮突然被送到一個如此陌生的環境，與外界又隔絕，又擔心自己會感染肺炎，所以當晚特別難熬。至第二天，張之亮才獲准在營內打電話給內地好友導演黃建新，望他聯絡其香港家人，及向香港導演會求助。
昨日導演會的張同祖接受電話訪問時說：「幾日前知道咗張之亮喺西安俾人隔離嘅事，佢老婆都搵過我哋，呢兩日我同張之亮已經取得聯絡，佢話頭兩、三日佢俾人安排住嘅隔離營環境好差，佢又聯絡唔到外界，所以好驚。
「但經過協調，𠵱家佢已經可以搬去另外一個環境比較好嘅地方隔離，其實佢搭嗰班機有肺炎乘客，咁西安政府為安全起見，將接觸過呢名男子嘅人隔離十日係無可厚非。」
張同祖續說：「我已經安慰張之亮，再過五日就可以出嚟，叫佢忍耐吓。我𠵱家隔日都會同佢通電話，了解佢嘅健康情況，聽佢講喺呢五日都冇出現過任何非典型肺炎嘅症狀，所以佢應該冇受感染。總之我哋已經同佢講，有乜唔妥就要即刻通知我哋，喺呢十日嘅隔離期，我勸佢可以做嘅就只係耐心等待，到證明自己冇受感染，然後安心離去咪重好。」
採訪：陳月媚
