《蘋果日報》今次先知先覺，上星期三發表「蘋論」，呼籲各界關懷沙士受難者家屬，照顧遺孤，好似係全港社評之中，第一個講呢個題目嘅，剛好配合名嘴黃毓民喺電台（上星期二、三）大聲疾呼，呼籲援助受難者。之後各界響應，到現在大概已捐到近三千萬元作濟急之用喇啩。
《蘋果》喺上星期四頭版報道幾個故事，令人心酸。左丁山諗起，買咗樓而成為負資產，更不幸病逝嘅，遺下層樓，家人點樣去供，會否成為銀主盤，銀行攞番層樓，遺孤無家可歸？於是打電話問賓架P，賓架P話：「你供甩層樓太耐，跟住又賣埋樓去租樓住，大概唔記得咗咯。我哋銀行要求客仔做按揭之時，買埋MortgageLifeInsurance，如果供樓期間不幸死亡，保險公司就會賠餘下按揭貸款畀銀行，即係話，苦主家屬承受遺產，可以繼續住響度，唔使再供樓㖭，再冇負資產問題。」
咁都好，算係不幸中之大幸。有此教訓，各位供樓人士，快啲去買供樓保險。不過賓架P話差唔多間間銀行都有同樣政策，所以《蘋果》報道嘅故事之中，其中一位不幸死者係東亞銀行職員，佢嘅家人一定唔使驚冇樓住。
現在係保險經紀最壞嘅時候（因為人客拒見，自己亦怕沙士），亦係最好嘅時候（因為恐懼係買保險嘅最大理由，現在人人恐懼染上沙士），做唔做到生意，睇經紀嘅應變手法咯。