十一歲的小麗，自母親患鼻咽癌病逝後，與兩名十五及十七歲在學兄長，靠父親葉先生從事散工勉強維持家計。受非典型肺炎爆發影響，葉先生連續數星期「冇工開」，令窮苦的葉家雪上加霜。「唔係自己唔去做嘢，係環境差到根本冇辦法搵到工。最慘手停口停，𠵱家我唔夠錢交租，仔女就快連食都冇！」蘋果日報慈善基金即時撥款，助葉家四口暫紓困迫。
葉家在香港青少年服務處社工轉介下，日前向本報求助，記者立刻登門到訪葉家，了解情況。四十五歲的葉先生，甫見記者即歎謂：「𠵱家出街一定要戴口罩，多咗樣使費，我惟有叫兩個仔除咗返學之外就唔好出街，細女讀小學未知幾時復課，屈喺屋企成個月，個人都變得冇厘精神。」
葉家租住的房間非常狹小，在不足一百呎的斗室內放置了兩張上下格床、一張摺枱、一個細雪櫃及一個雜物架後，只得丁點兒的活動空間，因此，最年幼的小麗要坐在床上看書，文靜的她顯得頗害羞，對記者提問一概沒有回答；十五歲的阿生，則一直彎腰坐在門前用手提電腦學習，他告訴記者﹕「部電腦係學校借畀我喺屋企用，不過最耐只可以借三個月。」
在旁的葉先生無奈地說：「我邊有本事買電腦畀仔女用，佢哋平時着嘅衫褲、屋企大部份電器，都係執番嚟㗎，生活艱難唔慳點得！」
葉先生的妻子於兩年前因鼻咽癌病逝，自此他需身兼母職養育三名在學子女，靠做散工養家。奈何本港經濟持續不景，葉先生經常開工不足。近月非典型肺炎事件令百業蕭條，葉先生手停口停，現已達山窮水盡地步。「我乜嘢工都做，好似搬泥頭、擔擔抬抬、喺地盤拆木板都做，但四月初到𠵱家，一日工都冇得開，去咗勞工處求助又冇消息，不斷打電話問朋友介紹，點知佢哋連自己都顧唔掂。」葉先生一臉憂慼說，他無力支付已到期的屋租及水電雜費，更恐有斷炊之虞。「幾個仔女冇早餐食，午餐同晚餐就食幾條菜或者用麵豉醬蒸魚仔送飯，只夠捱多幾日！」
蘋果日報慈善基金有見葉家經濟陷於困境，即時撥款一萬元緊急援助金予葉家應急，另轉送一些口罩給其一家四口應用。讀者如欲轉介搬運、地盤或裝修工作給葉先生，可致電：29908688。
捐款編號：C0916
暖流熱線
電話:29908688
傳真:23702192
電郵:
網址：
