恒指回吐27點，老牌紅籌普遍幾好，中信泰富（267）例外。
華創（291）收6.25元，有15仙進帳。交投最旺嘅華創Call輪9270收3.3仙，彈升18%。隻輪9月中夠鐘，溢價8.6%，槓桿率18.9倍。華創有Call輪5件，真正可以炒嘅只有9270，其他4件數據唔靚又難買賣。
華創上星期最低5.70元，至今反彈1成，昨日成交係前日嘅3.4倍，有護盤活動，吼住回順之時，趁低買隻9270，見反彈有錢賺即計數。
中銀（2388）亦係硬淨，收7.80元，微升1格。中銀Call輪9462收5.8仙，升5.5%，隻輪7月夠鐘，溢價0.8%，槓桿率13.4倍。隻輪適合低買高賣，因為正股波幅細，所以隻輪波幅亦唔會太大。中銀其他Call輪，冇乜成交而數據又麻麻，好難炒。
中信泰富昨日開股東會，股價跌20仙，收13.35元，皆因公司講到明，本年度業績會受沙士影響。
其他紅籌堅穩，中信若然再跌，可博反彈，值得留意嘅Call輪9604，11月到期，現價9仙，溢價11.6%，槓桿率14.8倍。中信其他4件Call輪，數據比唔上9604，而且有幾件根本冇成交。
章盛