喺星期三除咗有米蘭雙雄呢場歐冠盃大戰外，香港重有阿仙奴對修咸頓嘅英超聯直播睇；不過，隨住阿仙奴喺星期日輸咗畀列斯，聯賽冠軍由曼聯奪得後，呢場波就變得冇乜意義；修咸頓更加牙痛咁聲，因為英國「天空廣播」見場波變咗例行公事，決定唔直播，搞到兩隊各冇咗五十萬鎊（約六百萬港元）嘅直播費。不過，香港球迷就幸福，因為有線STARSports台仍會直播，但由於同米蘭大戰撞時間，收視率有幾多就……。
但修咸頓領隊史特根揚言球隊一樣會搏命踢呢場波，因為如果球隊贏晒餘下兩場聯賽，會得第八名，輸晒就可能得第十三；而聯賽最後排名每高一級就多四十萬鎊，咁八至十三名差五級，來回成二百萬鎊，所以球員去盡咁話喎。
講開阿仙奴呢場波，由於競賽意義唔大，雖然梳打埠一早開盤，重開兵工廠讓一球，但其他博彩公司都按兵不動，唔單止冇開亞洲盤，就算標準盤都未見到；咁又係嘅，小心駛得萬年船，萬一開錯盤隨時血本無歸，所以我求大俠奉勸各位球迷，不妨睇到兩隊陣容先落注。
蘇格蘭嘅費格遜帶領曼聯十一年來八奪英超聯錦標，另一蘇格蘭人，桌球經理人杜奧重威。喺威廉斯奪得世界桌球錦標賽冠軍後，佢成為過去十四屆以嚟杜奧麾下第十一位世界冠軍，合共帶來一百七十萬鎊收入，難怪佢好大口氣咁話：「我贏錦標比老費多！」
繼較早前英超布力般後，意甲烏甸尼斯亦話就算攞唔到來屆足協盃資格，都唔會參加圖圖盃，免得踢呢個足協盃外圍賽而搞到球員受傷。我求大俠就話，其實自從歐冠盃擴大咗後，足協盃無論地位同金錢上都幫唔到啲球隊太多，何況係圖圖盃？烏甸今次咁諗係明智嘅。
至四月尾為止，巴塞隆拿今屆蝕咗五千五百萬歐元，連同呢個球會紀錄性數字，相信佢哋季尾會負債成九千八百萬歐元，而且球隊亦有可能參加唔到來季歐洲賽，於是有消息話佢哋一定會賣球星，睇怕值錢啲嘅前鋒古華特想唔走都唔得嘞！
小馬啱啱千辛萬苦打敗拓荒者晉級，班主古賓應該興高采烈至係，不過當佢發現喺第二圈作客帝王嘅第三同第四仗，竟然要連打兩日，球員完全冇機會回氣時，立即大發雷霆，怒罵聯盟嘅賽程安排簡直喺白癡！佢重話自己係投票贊成將季後賽首圈由五場增加至七場嘅班主之一，早知賽程要壓縮，佢就打死都唔會贊成。