市場預期美息不會變動，美股及港股牛皮，主要等格老發表經濟評論。其實美息已很低，再減息都冇作用，反而令人覺得美國經濟好唔掂。
噚日港股收市後，有大戶配售股份，減持裕元（551）同中國石化（386），最多可套現逾14億元。唔知呢個趨勢會否持續，自從非典型肺炎爆發後，唔少企業都話要保留現金，除減少派息外，趁高價減持證券投資，亦是增加現金的上策。
中華燃氣（603）過去幾日成交增加，股價又穩步上升，吸引唔少散戶入市玩即日鮮。黑客話此股傳聞有大戶出貨，噚日有人由頭沽到落尾，股價全日跌4.6%，收報6.2仙，成交增至1149萬元。據聞大戶手上重有好多貨，但會否繼續沽就好難講。
陽光文化（307）主席楊瀾以每股5仙增持1.82億股，據聞股份是向個別股東買入，並非在市場購入。楊瀾於去年8、9月亦有入市增持，不過對股價的支持只屬曇花一現，其後反覆下跌。唔知楊女士今次再度增持，公司股價又會否反覆下跌呢？陽光股價噚日曾經升至5仙，但最後倒跌6.7%，收報4.2仙。
自從嘉里建設（683）提出私有化後，市場即展開尋寶遊戲，香港興業（480）大幅反彈，噚日繼續再升7.4%，報1.45元。
香港興業每股資產淨值超過5元，若查氏家族亦以40%折讓幅度提出私有化，照計死數為3元，即是香港興業尚有100%的上升空間。不過，現時要成功私有化唔容易，大股東是否願意花工夫搞私有化，等尋寶人士開心吓，就真係好難講。
阿虎