小初前日講完鞋股有得諗，重讚緊裕元（551）股價走勢靚，原來主要股東都有同感，噚日在收市後進行批股，而且重係講緊幾億元咁多。
據講係有投資者要貨，並可增加股份流通量，但小初就比較偏激，覺得賣嘅係舊股，點講都係減持套現最真。
雖然批股作價15.40元，較裕元噚日收市價16.05元，只有4%折讓，但隻股升返16元樓上無耐，咁快就批股，對裕元股價難免有壓力。
另外重有件事令小初覺得離奇，裕元股東在收市後才批股，但噚日裕元成交特別大，有成9619萬元，其中竟然有約4700萬元係沽空盤，竟然真係有人咁叻仔，一早知道有人會減持裕元股份，預先扒頭借貨沽空，等待股價回落至補倉獲利，呢單嘢認真耐人尋味，宜加研究研究。
慕容小初