過幾日就係母親節，又係發展商為商場搞活動嘅重要檔期，有嘢送同有明星睇就梗係最煞食啦，恒基旗下嘅將軍澳新都城中心商場就全部都有齊晒嘞。
新都城中心商場喺今個禮拜日，會搞「新都城中心Shine半熟男孩」簽名演唱會，人氣組合Shine會唱歌同做抗炎運動示範。買嘢滿三百蚊，可免費換到Shine嘅最新大碟同恒基送出「抗炎套裝」。
馬鞍山新港城中心商場，就喺本月18號搞「馬浚偉新帝女花情牽新港城」簽名演唱會，重有唱片換領，25號就係「六樓后座眾星匯聚新港城」，有戲票換領。
另外，九龍建業嘅太子始創中心，喺母親節就同五間食肆聯手，推出晚市優惠，重有兩個鐘免費泊車，即日起消費滿三百蚊（一張發票計）就送五十蚊始創中心優惠券。
中原工商部營業董事郭楚華講，柴灣明報工業中心，A座9樓約一萬四千呎樓面，啱啱由喺油塘區開廠嘅製衣商承咗，450萬，圍起每呎317蚊。比原業主91年買入價每呎1770蚊，足足唔見咗八成二。
郭楚華指出，原業主係台資電視台，早前將持有嘅10樓全層，同2樓部份樓面，以呎價367蚊賣咗。
發展商近排興搞代理銷售比賽，用現金獎賞表現好嘅代理，啲貨又可以賣得快啲，大家都有着數。由四間發展商起嘅將軍澳中心，上個禮拜至宣布舉行五月銷售獎比賽，邊間代理最快做到二十單，就獎二十萬，點知美聯唔使一個禮拜，就達目標，發展商今日頒獎。呢類比賽咁見效，搞多啲個市都旺啲啦！
喺非典型肺炎打擊之下，好多人都以為工商物業租務市場好唔掂，其實陸續都出現唔少大手租務。美聯物業高級營業經理伍錦倫話，好似葵芳新都會廣場，最近就有兩層租出，夾埋都近三萬一呎，呎租十蚊，租客係兩家貿易公司。葵涌萬泰中心十八樓全層，近萬六呎，月租約十三萬，呎租八個二。
至於工業樓就有荃灣德士古道工業中心，萬四呎地廠，月租十萬，呎租七蚊。屯門百利中心二樓近兩萬八呎，月租就平啲，五萬四蚊，呎租兩蚊。
近排內地非典型肺炎疫情愈嚟愈嚴重，啲人唔敢外遊，好多去咗睇樓，結果新盤銷情好咗。廣州盈昇房地產副總經理鍾嘉年話，旗下翠馨華庭（圖三）喺今個月1到4號嘅假期，總共賣咗六十五伙，成績唔錯。
聽代理置業國際話，發展商加推一站式全包付款法，幾吸引，買家喺入伙前畀萬八人民幣，就包晒首期、入伙前嘅銀行供款、買賣合約同按揭費。其他費用到8月底入伙至畀。
樓市進一步尋底，業主放盤，都想知道值幾多，係咪自己心目中嘅價。忠誠拍賣行最近攞到三項全幢舊樓嘅獨家代理權，全屬同一業主，由買家出價，等佢考慮賣唔賣。
三項物業都係六到八層高，樓齡四十幾年，分別係土瓜灣譚公道七十一號、上鄉道五號，同埋紅磡新柳街四號，地盤面積九百到兩千零呎。收緊嘅月租最貴都係五萬零蚊，究竟值幾多錢呢，有興趣嘅就要計吓數嘞。
蘭西發現，原來呢啲舊樓單位，每月租金大部份都係三千零到五千蚊，呎租一般六到八蚊。不過，譚公道71號7字樓，約六百四十八方呎，分為中房同後房，包差餉月租分別係六百五十同九百蚊，認真抵租。
蘭西
電郵地址：
