中國星計劃在明年開拍由杜琪峯執導的港版《教父》《龍城殲霸》，製作成本高達億五元。六個小時長的《龍》片將分三部曲推出，戲中劉德華與古天樂將會飾江湖父子，張栢芝則飾江湖大嫂。
向華勝旗下的永盛電影公司，七、八年前曾構思一部《教父》式電影《龍城殲霸》，故事人物涉及社團龍頭家族，後來因題材敏感及製作費太大而擱置。但《無間道》此類陽剛電影票房大收後，向華強的中國星最近對《龍》片感興趣，有意請杜琪峯執導，內容似港版《教父》，以史詩式的浪漫手法去講一個家族三代的興衰史和恩怨情仇，演出者有劉德華、古天樂、張栢芝、黃秋生及劉青雲等。
杜琪峯計劃把這個三代情仇的故事，一口氣拍成六小時長的電影，由四十年代拍到八十年代，然後分三部推出，製作成本約一億五千萬。九龍城寨未清拆之前，是個三不管、龍蛇混雜的地帶，涉及不少江湖情仇，由於故事主要場景在此，故必須選地重搭一個城寨景，現正待杜琪峯拍畢《健美先生》後，與韋家輝一起整理劇本。
首部曲會以華仔所飾的年輕小子的發迹故事為主，二部曲會由華仔引領飾演其兒子的古仔出場，至於三部曲的人選則未落實。記者昨日聯絡杜琪峯，他在電話中說：「《龍城殲霸》搞咗好多年，但一直冇機會拍，因為部戲演員多，製作費貴，加上題材牽涉政治同江湖情仇，所以處理劇本要特別小心。最近向生（向華強）提過出年想拍呢部戲，但一切重未落實，就算真係拍，都肯定唔係拍某家族嘅故事。呢部史詩式江湖片，因為要拍三代，所以最保守都要分三部嚟拍，而且製作費會好高，要成一億，但有外國電影公司對呢部戲好有興趣，應該會同中國星合作。」
杜琪峯續說：「部戲人物眾多，單係男主角就有七個，女主角戲份唔係咁多，所以女主角人選都未諗好，華仔、古仔係我心目中嘅主角人選，其他中國星嘅演員我都希望盡量可以用到。但𠵱家韋家輝都未寫劇本，個古仔會點拍，我都講唔到，原則上個故事會由戰後香港拍到八三年反黑組解散為止。」
向華強太太陳嵐在電話中亦強調說：「我哋係計劃拍呢部戲，但部戲絕對同向氏家族無關。部戲投資咁大，有好多嘢重未落實，等件事再成熟啲，自然會通知大家。」
採訪：陳月媚
