新增沙士個案繼續下降，唔理港府是否報細數，港股照升可也，恒指突破8900，收報8916，升108點，成交69億元。令人擔心咗一排嘅國泰（293）只減少派息50%，每股派息0.28元，總算謝天謝地，而太古A（019）及太古B（087）更加係虛驚一場，宣布維持派息不變，算係公司近期嘅最好消息。國泰全日升1.5%，收9.80元。太A更勁升逾4%。收32.30元。不過，標普調降太古展望評級，太古升幅今日隨時會報銷。
鵬利國際（268）手持5億元現金，早前憧憬會有特別派發，曾炒過一輪，但上月公布業績，1個仙都冇派，令投資者大為失望，股價亦回落。點知1個月後竟宣布私有化，可算給小股東一個大驚喜，每股私有化作價0.74元，相當於該股近兩年的高位，雖仍較每股資產淨值有49%折讓，但作價對小股民而言，已算相當吸引。同系的中糧國際（506）亦被推高2.9%至2.675元收市。不過，母公可能繼續向中糧注資，相信短期內唔會成為私有化對象。
城電（1137）今日公布業績，由於已收回服務承諾保證金3500萬元，另獲香港電話退回9700萬元補貼費用，一般估計業績不俗，兼可能派息。噚日已有人掃貨準備食胡，股價升4.3%，收報1.71元。
美吉利（353）早前公布獲大馬財團ChrictonHoldingsSdn.Bhd入股16.67%，注資金額達7470萬元，但入股時間就一拖再拖，主要藉口是大馬外滙限制，令買方未能滙錢出境收購美吉利股份。黑客話，此股因入股消息炒高至0.215元，據聞買方其實1個仙都未畀過，即使最終唔入股亦唔會被殺定。買方如果唔入股，此股肯定出現大震盪。
阿虎