Beyond前晚舉行尾場演唱會時，三人興奮得呼籲香港人要齊心面對逆境，又寸香港政府及梁錦松的辦事能力，世榮自言怕23條，但仍說：「日日唱《獅子山下》係冇用嘅。」
為紀念組隊二十周年，Beyond於紅館舉行五場「Beyond超越BeyondLive2003演唱會」，前晚演出尾場，觀眾情緒極之高漲，成員黃貫中（阿Paul）見狀在台上說：「一直以嚟香港人只識賺錢，俾人話人情薄過紙，商業掛帥又冇愛心，我最近先發覺唔係，面對逆境面對疫症，香港人係可以發揮團結精神，希望遇到乜嘢都大步檻過。」
之後阿Paul又揶揄政府說：「好多謝政府同一班高官，佢哋真係用心良苦，用呢種方法訓練我哋，提升我哋嘅內在本能。」全場觀眾此時即高聲勁噓，阿Paul笑說：「所以我哋唔好成日鬧佢哋，佢哋真係對我哋好好。」
最後阿Paul感謝前線醫護人員，而世榮又說：「舊嘅嘢要抹咗去，唔好只記住以前，今日係五月四號，其實若干年前係五四運動，佢嘅精神係破舊迎新，所以我哋要重新開始，日日唱《獅子山下》係冇用嘅。」觀眾即拍掌歡呼，Beyond即合唱一曲《Amani》。
世榮被問到為何叫人不要唱《獅子山下》時，他說：「真係夠啦。」阿Paul即謂：「你言下之意係咪話梁錦松先？」世榮說：「唔好亂寫，我真係好怕23條，我真係唔敢亂講嘢。」
Beyond在慶功宴接受訪問時，得悉演唱會主辦人丘亞葵會為他們在下月加場，預計加二至三場，家強說：「我哋想加場嘅第一場喺六月十號家駒生日嗰日開，嗰場嘅所有收入不扣除開支，要嚟捐畀SARS受害人嘅家人。」
另外，朱茵、許志安、吳國敬、梁漢文與女友、徐濠縈、陳小韻、黃家強父母與黃貫中父母都有到紅館捧場。
採訪：李珮洳
攝影：陳慧安
