張堅庭說，平時除了踢波及打網球兩種帶氧運動外，也會打高爾夫球，如工作太忙就會做些簡單的運動，如快速深呼吸與及拉筋，也可令身體更健康。
他說：「我有時間就會拉筋，盡量拉鬆身體各個關節，而最緊要拉埋條腰骨。我細個曾經跌傷過條腰，之後常感到痛楚，而我喺二十六歲就開始拉腰，拉咗一段時間，腰背傷好番晒，再冇痛過。其實要拉腰骨並唔太困難，我響間房度搵人裝條鋼筋喺天花，有時間跳上去掛住，已經可以拉到條腰，就可以有效拉鬆腰骨嘅關節同組織，而經常拉筋重可以有效減少身體嘅無名腫痛。」
「另一種有運動就更加方便，坐響度已經做到，就係用好快嘅速度深呼吸，呢種運動可以加強心肺功能，多做自然對身體有益。」張堅庭說。
「我覺得飲食對健康相當重要，所以日常會相當小心飲食，就算我所經營的餐廳在選材及用料上都相當講究，既不用味精，也必須保持樣樣清潔。至於個人飲食習慣上，是盡量少肉多菜，像西蘭花炒牛肉，我八成是食西蘭花，只食兩成肉；此外，亦會定期飲些有助減低膽固醇的湯水，此外，每日都會食維他命丸，如維他命E，維他命B+及維他命C等。」
運動篇
踢足球：通常2星期1次，但有時1星期3晚
打網球：2星期1次
高爾夫球：2星期1次
早餐：麥皮
午餐：蒸飯
下午茶：檸蜜及多士
晚餐：住家飯，少肉、多菜及魚