曼聯從阿仙奴手中搶走英超聯獎盃就示範咗後上威力有幾強，西甲聯方面似乎真係好有機會出現翻版情況，睇吓拉科魯尼亞日前大炒維爾瓦，皇馬想攞冠軍真係唔易。
拉科魯尼亞自從歐冠盃出局之後，專心應付聯賽的確有愈戰愈勇之勢，除咗輸畀馬略卡之外，近數場都贏波兼大數對手，就算冇咗前鋒查斯坦，重有馬卡爾喺度。
呢位荷蘭射手不讓佢同胞、曼聯雲尼斯達羅喺英國威晒；禮拜日對維爾瓦大演帽子戲法，射術之精湛，睇到求大俠心花怒放。皇馬現在埋首在歐冠盃對付祖記，照睇佢哋嘅聯賽爭標大患，係拉科唔係皇蘇。
重有，我求大俠發現今屆歐洲各大聯賽，若有球隊上仗能大勝者，多數唔能夠保持；維爾瓦上次只係靠維拉利爾踢少兩件，先贏五球，賽績唔能作準；無故大勝，千祈唔好亂追寶尾呀！
曼聯上星期六大勝查爾頓係今季主場最後一戰，英國《太陽報》就捕捉到碧咸完場後強忍淚水離場，因為當時曼聯重未捧盃，所以就指萬人迷係因為唔捨得離開曼聯投皇馬而觸景傷情。呢段新聞無碧咸回應，但就放喺頭版，唔係體育版頭版，足見碧咸真係好有市場價值，睇嚟今個暑假見報率都係曼聯、碧咸同皇馬嘅世界囉！
AC米蘭聽日同國際米蘭嘅歐冠盃準決賽打吡大戰前夕傳來好消息，因為施多夫預計可以及時復出。呢位荷蘭國腳早前因為膝傷，一直傳出今季會提早收「咧」，如今極速傷愈，話晒佢都踢過兩次歐冠盃決賽，萬一有機會爭冠軍，有經驗真係會有好大幫助㗎！
中國男足教頭阿里漢公布咗新一期集訓名單，備戰東亞盃足球賽，除咗范志毅外，孫繼海、李鐵等其他四位效力歐洲球會成員入選，但謝暉都有份被重召就令人意外。不過，我求大俠覺得阿里漢亦有道理，話晒佢喺德乙有比賽，狀態一定好過休戰嘅甲A聯賽前鋒。
今季蘇超聯錦標形勢同樣激烈，榜首嘅格拉斯哥流浪禮拜日只能同鄧地打和二比二，巴利費格遜更射失兩個十二碼；如果些路迪聽日贏馬瑟韋爾，兩隊就會同分兼剩三場聯賽。我求大俠當然希望些路迪贏波，蘇超聯咁緊湊近年好少見，以些路迪走勢，隨時成「雙料冠軍」。
雖然拓荒者班「監躉球員」場外嘅無恥行為好乞人憎，但係我大俠都要讚番佢哋一次。喺落後小馬○比三下連追三場扳平。雖然到最後第七場功虧一簣，喺傷兵滿營下，依然同小馬鍊到底，真係鬥志可嘉！