港股話彈就彈，唔少股份都升番好多。裕元集團（551）就算在沙士橫行之時，股價亦好硬淨，如今被納入大摩指數，加上市場憧憬佢會成為藍籌，股價表現就更加靚。
經紀黃話，既然裕元受垂青，不如留意其他鞋股，例如信星（1170）同埋新灃集團（1223），皆因佢哋Size細細，分分鐘升幅會更可觀。
裕元噚日平收16.20元，PE12.86倍；信星升2%，收1.95元，PE11.19倍；新灃則升4.4%，收2.375元，3隻鞋股中現價PE佢最低，只得5.67倍，息率更高達9.68%。
經紀黃話，信星年內最高見過接近2.60元，早排因為沙士問題，有芬佬唔睇好沽貨，插落去1.80元之後反彈，查實信星在休閒鞋方面，不知幾好生意，早幾日先至有歐資行出報告推介。
至於新灃，早排公布業績勁靚，股價急升後回吐，但聽聞貨源仍然歸邊，近排又見搭好個棚似做嘢。經紀黃估計，3隻鞋股中可能升幅最大係佢，但風險亦最高。
慕容小初