𠵱家周圍都講防「炎」，家居係其中一個要講求清潔嘅地方，但係好多人都唔係咁鍾意做，信和就開拓呢個可以話係一舉兩得嘅商機，推出「家居防炎消毒服務」。
信和物業管理總經理杜日生話，旗下物業嘅公眾地方，管理公司已經做足清潔消毒措施，為令住戶更安心，因此推出呢項服務。
「家居防炎消毒服務」共提供四項服務，逐項收費，如噴霧消毒，就會同間屋徹底消毒，要用兩個鐘頭，收費每次六百蚊。
而要三個鐘嘅家居清潔服務，就收費八百蚊。好似通渠等技術支援服務，需時半個鐘，盛惠百五蚊。
至於另類嘅汽車臭氧消毒服務，就要一百蚊，需時半個鐘。
聽信和講，今次係喺共千六個單位嘅北角海天峰、中半山梅道一號、畢架山帝景峰、九肚山寶松苑同大埔寶馬山幾個豪宅盤試行，效果好就推廣至其他有管理嘅樓盤。
長實畢架山一號，喺非典型肺炎期間都賣得唔錯。香港置業淨係上周末就成咗4單。
港置九龍豪宅發展新樓專組區域經理馮智賢話，一位喺香港住咗十五年嘅外籍客，一直都租住開港島區豪宅，有見樓價跌到咁殘，又為咗方便返工，睇樓一個月後，就決定買畢架山一號，用約800萬，買入11座高層A室，1469方呎，呎價5446蚊。
公司另一區域經理葉展均話，一名原本住喺荃灣嘅業主，睇咗一年樓，為子女學校問題，終於揀畢山，用660萬買入9座中層D室，1326呎，呎價4977蚊。
另外，港置今日就同長實搞記者會，重請嚟堪輿學家余中哲，講吓畢山嘅風水。
為鼓勵用家或者投資者，喺非典型肺炎肆虐期間積極入市，卓先拍賣行下個禮拜一舉行嘅銀主拍賣會，會送出一百蚊超級市場現金禮券，畀最先入場嘅二百名準買家。當日投到物業嘅買家，重唔使畀佣拍賣行㖭。代理行家帶客到場兼投到物業，就有兩千蚊轉介費。
另外，場內會派發外科手術口罩，重有消毒酒精同抹手紙提供，等大家投得安心。
美聯派四月份成績表，工商舖一馬當先，整體成績同收入都好過住宅部，收八十萬佣金，其中一宗就收近五十萬，係單一成交最高佣，由九龍寫字樓組客戶經理呂少芬（圖三）促成，並當選四月份最佳營業員。
租出嘅單位超過兩萬方呎，每方呎租金約十二蚊，三年約，租客同區另有自置物業，因擴充業務，至會再租寫字樓。
不過，呢單生意都唔容易做，據講由開始傾到簽約歷時半年。上月除呢單大額租務外，美聯另外重做咗十宗商廈租務，主要係尖沙嘴區商廈，好似康宏廣場、南洋中心等。
世邦魏理仕獲惠普委任，負責提供亞太區物業顧問服務。
世邦魏理仕亞太區（公司客戶服務）董事總經理JohnFalkiner話，惠普喺亞太區佔用嘅物業樓面超過五百萬呎，包括寫字樓、工廈、貨倉、商舖同數據中心等。
公司會負責協助惠普重組現有設施，達致物盡其用。服務範圍尚包括物色租用物業、檢討現有租約同商談續約等。惠普係全球個人電腦生產商，包括個人電腦、商用電腦同電子手帳等。
蘭西
電郵地址：
