陳秀雯成為纖體公司最新代言人，正式告別肥師奶形象。陳秀雯纖體後最滿意的是重拾背部與腰部的線條美，令她信心大增。她又表示纖體成功後，舊衣服全部不合穿，需重新置裝，更想嘗試演妖豔角色。
最近陳秀雯成為皇室纖形的最新代言人，纖體成功後的她穿上多款露腰、露背上衣和短褲拍攝廣告照，展示腿部及背部線條，告別根深柢固的肥師奶形象，感覺煥然一新。
陳秀雯昨日在電話中說：「我好滿意呢輯相，尤其係好多女性朋友都話我影得靚。對我自己嚟講，女性對呢輯相有感覺重好過男性讚好，我以前唔敢着露背衫，因為我背部好厚，𠵱家纖體後，背同腰嘅線條都返番嚟，真係好開心。」
陳秀雯續說：「不過，衣櫃啲衫就全部要買過晒，要大出血重新置裝，不過都係我第一次以咁開心嘅心情去買衫。」記者笑言陳秀雯這輯照片可媲美鄺美雲（Cally）的S型美態，她即謙虛說：「Cally嘅S型身材係天生，唔同嘅。」
纖體成功後，陳秀雯可嘗試以前未演過的角色，她說：「肥師奶就做過啦，瘦咗之後可以試吓啲較為妖豔嘅角色，對我自己嚟講都係一項挑戰。」
問陳秀雯若接演妖豔角色不怕要行性感嗎？她笑說：「電視台嘅尺度唔會好大膽嘅，最緊要係配合角色需要。」問她近況如何？她說：「今年算係回氣嘅一年，舊年出咗唱片，今年就主要係四圍去登台，暑假期間會去美國，但係因為非典型肺炎有啲登台工作都受影響，例如去新加坡登台就要延遲啦。」
問陳秀雯收入會否大減？她說：「冇所謂啦，有啲嘢係錢買唔到嘅，而且人係唔可以期待自己年年嘅收入都一樣，唔可以好似機器咁不停工作嘛。」
採訪：BeverlyWong
