恒指升108點，咁嘅升幅，算係適中，襟玩啲，一下升二三百點，好易引來回吐。
電訊股醒神，升幅最大嘅係聯通（762），有3.5%，不過聯通Call輪一係冇乜成交，一係溢價高得滯，冇得玩。中移動（941）升2.8%，吼低買成交旺嘅Call輪可也。中電信（728）升幅2.6%，派成績表以來，陰陰上，有基金收集，中電信Call輪9696有得諗，11月夠鐘，溢價5.2%，槓桿率9.1倍。其他3件中電信Call輪，數據都可接受，不過成交太奀。
石油股冇乜勢，美國股神新寵中石油（857）收市價1.82元，冇變。中石化（386）微跌1格，收1.50元。中石化近期冇升到，實際幾日內由高位回落6仙，啲Call輪其實好抵揸，風險有限，可以揀9379同9227收集。
9379今年8月到期，現價8仙，溢價4%，槓桿率18.8倍。9227年底到期，現價21仙，溢價0.8%，槓桿率7.1倍。中石化Call輪，缺點係交投太靜，買賣難。
新地（016）升80仙，個勢未盡。昨收38.20元，有機會上試40元。有兩件Call輪可以諗吓，9779今年9月到期，現價20.5仙，溢價15.3%，槓桿率18.6倍；9786今年10月到期，現價20.4仙，溢價12.7%，槓桿率18.7倍。
章盛