張堅庭話自己是百分百標準球迷，過去最捧利物浦，現在最愛皇家馬德里，因為他們既好波，又夠「奸」，還有個施丹在陣。他說：「細細個已經同七、八個同年紀嘅朋友仔，偷入花墟（現旺角球場）睇波，有時俾警察或者球場職員捉到，就罰我哋洗廁所，之後放我去睇下半場。」
「我以前係利物浦球迷，但近呢幾年就勁鍾意皇馬，睇佢哋踢波實在太美妙，可以話將足球提升到一個藝術層次；但佢哋啲友仔有時好鬼奸，對同級球隊就搏命，間中就會踢番場『假波』，失分畀啲擦鞋仔球隊。可能佢哋班球星驚俾人踢親所以唔會場場搏命，而有時收夠籌亦唔會再去攻人。」張堅庭笑着說。
「阿庭」說，施丹在球場已不是一名超級球星，而是一位足球藝術家，他說：「施丹高大，技術好又斯文，但踢波嘅時候動作好柔、又優美，重完全捉唔到佢嘅腳影，射波又得，我覺得佢係足球場上藝術家，踢波時似跳芭蕾舞。」雖然盛傳碧咸可能加盟皇馬，但張堅庭認為，如以碧咸的技術實在不值皇馬給他合約，但如以市場價值而言則是另一回事。