金管局總裁任志剛與前綫的劉慧卿呢對歡喜冤家，昨日又在立法會相遇，不過今次冇擦出火花，反而有講有笑，一唱一和，原來今次佢哋有共同「目標」──阿松。
話說噚日開會期間，卿姐對外滙基金薪酬委員會，全部改由非銀行家成員組成甚感欣喜，又追問何時開始。查實此一轉變去年已施行，該局交畀立法會的文件都有提及；不過具體時間，任總若有所指、笑晏晏地說容後補充，因為「唔想混亂咗啲時間」。卿姐果然轉數高，即刻意會講緊邊個，就話補充準確資料，好過學財爺，上晝畀完資料下晝就改，搞到自己「聲名狼藉」。
噚日田北俊又提到佢與任總食飯時，建議金管局落order，等銀行一刀切放寬中小企免還息三個月；卿姐聽到田少與任總私下有飯局，發問時即謂自從去年買樓事件後，任總再冇約佢本人及前綫同僚食飯。任總即刻笑笑口咁話，散會後一定約劉議員聚一聚，但唔係刨黑菌咁高檔。
講開一刀切，任總又真情流露。佢話唔係樣樣都應該一刀切，好似退稅三千蚊，「我要嚟做乜？咪捐咗去囉」，咁係咪暗示呢個措施有問題呢？
傳真︰2623-9278
電郵︰