已經變咗大柏林嘅鄭柏林噚日同鄭希怡、余文樂、蘇玉華等出席喺港台舉行嘅「港台經典有線重溫」記者會，遲啲有線會重播港台劇集《香港歲月》同《柏林週記》。當年《柏林週記》嘅主角小柏林，人見人愛，冧盡唔少人，但大個咗嘅柏林已經冇咗份稚氣，戴埋眼鏡同普通中學生冇分別。
現年十七歲、讀中六嘅柏林雖然好耐冇面對鏡頭，但噚日佢上台講嘢嗰陣一啲都冇怯場，佢遲啲重會喺有線度，講吓佢以前拍劇嘅趣事，問到佢咁耐冇出嚟有冇唔習慣？柏林話：「都冇問題，冇唔慣。」問佢有冇考慮再拍劇或唱歌？佢話：「我都係想讀好啲書，因為我想做醫生，不過如果要揀拍劇定唱歌，我會揀拍劇多啲。」
此外，鄭希怡終於可以搵到錢自己搬出嚟住，唔使再住公司宿舍，佢話：「我𠵱家不停搵屋，最緊要有個位畀我跳舞，最好有三間房，月租我預一萬鬆啲啦。」
楊恭如自從同周正毅結束好友關係之後，有傳佢近日頻頻睇樓，似有意搬離裕景花園。對於呢件事，楊恭如噚日透過經理人羅嘉慧表示冇諗過搬屋，至於有冇去睇樓？羅嘉慧就話：「佢不嬲都鍾意四圍去睇吓樓，大家咪即管睇吓佢係咪搬囉。」問到楊恭如係咪同周正毅分手？羅嘉慧話：「關於周生嘅嘢，我哋唔會回應。」
麥浚龍（Juno）噚日去咗紅磡同來自嵩山嘅少林武術團學武，一班和尚表演咗唔少少林功夫，其中重有鐵頭功，睇到Juno目瞪口呆，Juno話：「鐵頭功真係好勁，如果我有時間都想去少林寺做俗家弟子學吓嘢。」
陳奕迅早前接受MTV台節目《MTV最愛》訪問，重玩心理測驗，結果陳奕迅喺「你的床上功夫」話題上，測驗出佢係個溫柔情人，會為咗討伴侶歡心而做出各樣花招同床邊服務，主持就問陳奕迅平時做開乜嘢床邊服務，佢就話：「遞紙巾囉。」即時全場嘩然，陳奕迅即刻補充話：「因為佢感冒咋。」
