姚樂碧（Ruby）四年前離開香港避靜，今日終於想通想透，鳥倦知還返港定居，令她決心回家的原因是掛念家人。她坦言身在海外時，曾為香港的報道而天天流淚，更自閉起來，不想見人。
在本地社交圈曾有「Ball場小公主」之稱的姚樂碧，四年前離開香港，其間足迹遍布美國、加拿大及英國等地，但是非依然纏繞她不放。Ruby日前接受訪問時，便坦言當時的日子她仍然不快樂。
Ruby說：「諗番呢四年，自己喺度逃避，以為去到外國會有份自由自在同寧靜，最終發覺自己係冇想像中咁堅強，成日會因為香港一啲報道令情緒跌到谷底，嗰陣日日喊，個人好自閉，唔想見人，搞到個人冇晒judgment（判斷力）。但係呢個階段已經完結，𠵱家已經諗通咗，正所謂欲加之罪，何患無詞？對於耐唔耐就出現傷害性嘅報道，我已經學識睇到好淡。」
今次回港，Ruby表示是從電影《魔戒》的角色中得到領悟，她說：「戲裏面其中一個角色Gandalf（甘道夫）話唔開心嘅事已經發生咗，點都唔可以返回最初，現狀係要面對同處理。我為咗一啲報道，搞到要離鄉別井逃避，與其係受苦，不如返香港，起碼有屋企人錫吖。」
Ruby表示經歷種種壓力下，深深感受到父母親的愛誠可貴，她說：「𠵱家令我最treasure嘅嘢，係可以返到屋企，有爹哋同媽咪錫，以前自己好任性，成日同屋企人拗頸。今次返到屋企，我爹哋畀我第一份禮物就係贈我四字真言『唔好高調』。」
當年大學畢業後，Ruby曾在百富勤任職投資業務，之後便沒有工作過，其間推出《情感寫真》一書。她表示今次回港想有一番事業成就，她說：「本來想做番老本行banking，不過個市實在太差，我成日俾人批評做事唔夠踏實，一時想搞網站，一時又話想做戰地記者。我返香港得嗰一個月，好多嘢都要重新update先可以有決定，我唔會因為有人講兩句，就投入一個未睇清楚嘅計劃。」
縱使曾經歷婚姻失敗，但Ruby對愛情依然抱有憧憬，她說：「我係一個好鍾意愛情嘅人，自己始終都係一個小女人，渴望有人同我分享喜同憂。」她表示在避靜期間，曾經與一個挪威人發展近大半年，最後因兩地相隔無疾而終。
對於擇偶條件，她依然有公主王子式的要求，她說：「我追求愛情唔係為咗有安全感，而係可以有companionship（交往）嘅感覺，對方要有一定嘅吸引程度，可以同我講人生哲理，如果你問我重會唔會再結婚，我自己都唔識答，但係相士就話我會，我依然相信一紙婚書係對愛嘅commitment（承諾）。」
採訪：RitaLeung
攝影：RickyChan
化妝：KamenLeungofTripleEdgeHair
髮型：RickyKwokofTripleEdgeHair
服裝及場地提供：中環太子大廈RalphLauren
