曼聯領隊費格遜不嬲以安全理由，唔畀球員揸電單車，但碧咸就一於少理，最近重用咗成十七萬幾港銀，買咗架名牌「哈利」電單車揸去練波，擺明當師傅冇到。
唔止咁，雖然碧咸對腳嘅保額高達六千萬鎊，但如果因為揸電單車受傷就無得賠，真係冒險啲啩。
一位碧咸老友都話，一旦碧咸俾費爵爺親眼睇見佢揸電單車，恐怕佢哋傳聞已經不和嘅關係會更差，到時碧咸想唔離隊都難。
另外，唔知碧咸老婆辣妹係咪知老公呢排鍾意刺激，聽講佢最近啱啱響美國入咗啲性感內衣……。咁多刺激嘢，碧咸真係要小心身體呀。
利記前晚響今季最後一場主場爆冷輸畀曼城，真係愧對江東父老。最羞家係幫曼城省兩粒嘅安歷卡係利物浦棄將，搞到紅軍無晒面。賽後領隊侯利亞重誇下海口，話下場可以作客砌低車路士，攞到歐冠盃席位；睇紅軍前晚踢得咁曳，毫無勁旅本色，我求大俠就唔睇好佢哋嘞。
截至上周六，曼聯好有機會響下仗作客對愛華頓賽後捧盃，不過愛華頓方面就話擔心控制唔住入場嘅曼聯球迷，打算唔畀曼聯響葛迪遜公園搞捧盃儀式同慶祝派對喎。我求大俠一聽就覺奇怪，以前好多冠軍隊都響人哋球場捧盃啦，係咪愛華頓最近戰績差，唔抵得人威呀。
早前我求大俠提到嘅拖連奴前日輸畀烏甸尼斯後，終於難逃降班厄運。佢哋球迷似乎一早對隊波死心，有啲重搞杯葛唔入場，所以呢場響格利尼中立場上演嘅比賽，竟然得三百人入座。上個禮拜人哋費倫天拿升上丙一組有四萬人捧場，得咁少人「送行」嘅拖連奴，真係相形見絀。
佩魯賈對布雷西亞、摩德納對安玻里都響前晚意甲賽前被大圍睇死和波，後者和波賠率離譜到得一點七，有啲莊家直頭唔開盤㖭。結果真係和波。又係嘅，摩德納同安玻里各得一分，各取所需，幾乎上岸。有無拉馬？我求大俠留番畀看官自己求驗啦。
NBA溜馬今季常規賽成績比上年進步，但明星賽之後成績下滑，重喺季後賽首圈出局，令溜馬擁躉同唔少傳媒都柴教練湯馬士台，認為佢應該「下馬」。但聽聞溜馬班主同班球員依然好支持湯馬士，認為球隊輸波唔可以怪晒佢，我求大俠都覺得溜馬係聯盟其中一支最年輕球隊，有待磨練，咪畀多一次機會佢囉！