九龍灣淘大花園喺非典型肺炎爆發後，交投一度死寂，但隨着疫情放緩，開始有番啲租務成交，當中部份重係原本就租開呢度嘅。
美聯彭文浩話，啱啱做咗單淘大花園租務，個客住開D座，因租約到期，喺兩三日間睇咗五六個單位，終於落實租番隔開少少嘅B座高層2室，面積就同原本租開嘅一樣，462呎，但新承租單位裝修唔錯，望海景，兼且重平好多，全包都係四千五蚊，呎租九個七。
彭文浩指出，呢類單位喺疫症爆發前要成五千五百蚊，𠵱家足足平咗一成八，若果同個客原先租開嘅六千蚊比，重平好多㖭。呢個價係𠵱家市場最低嘅水平。個客住開呢區，覺得冇問題，咪搵番附近嘅單位囉，D同B座都好近E座㖭。
淘大花園之前都有住客購入單位嘅例子，彭文浩話，不過比例唔算太多。
本港經濟飽受非典型肺炎打擊，唔少人因此失業，或變相被減人工下，衍生唔少社會問題，例如有業主拖欠銀行供款，估唔到連住宅管理費都有拖欠情況，重愈嚟愈嚴重。
最近有屋苑管理公司出通告，叫啲住戶快啲交管理費，否則會影響日常嘅管理工作。管理公司重話會循法律途徑追討。
本港好多業主已經變成負資產，收入又不斷減少，今次再俾非典型肺炎搞一搞，真係苦不堪言。
每逢過時過節除係發展商嘅促銷物業良機外，重係商場零售商戶嘅黃金檔期，不過，好多時大搞宣傳嘅，都係大發展商旗下嘅商場。蘭西最近收到料，嘉華地產位於西灣河嘅鯉景灣商舖食肆（蘇豪東），會喺今個禮拜日，舉行「好孩子親親母親日」，當日喺度消費滿二百蚊（以一張發票計），就可以帶同小朋友去露天廣場影番張「交通型警」相。
商場內重有攤位遊戲，啱晒一家大細玩。至於午市時段幫趁食肆嘅母親，就獲贈康乃馨一支。
嘉華地產旗下嘅商場唔算多，但將中環蘇豪概念引入旗下嘅鯉景灣商場，改名叫鯉景灣（蘇豪東），結果好成功。近期商場大業主都搞活動幫啲租戶，嘉華都唔例外。
世邦魏理仕最新一期內地物業報告話，未來五年，北京將有約三千幾萬呎商場落成，聽落好誇張。連北京市商業委員會都宣布，將會限制樓面10.7萬呎以上嘅商場，只可喺二環路以內興建。
至於北京商舖市道，空置率只有9.5%，優質首層舖位，日租每呎兩蚊（實用面積計，未計管理雜費），優質二樓商舖日租每呎都要差唔多一蚊。由於熱門地點嘅高檔商場舖位供應有限，想租就要慢慢排隊等嘞。
中原為激勵士氣，不斷搞獎賞比賽鼓勵員工勤力啲開單。好似上個月中就連氣搞咗「開心復活大賞」同「極速九天衝刺大賞」兩項比賽，都係鬥多營業額或促成宗數。結果前項比賽由東涌分行同駿景園分行分別攞咗宗數及營業額最高獎。而第二項比賽則由青衣城分行同加州大道分行奪得冠軍。中原今次總共送出七萬蚊獎金。
另外，中原（中國）足球隊年初同記者隊較量輸咗後，前日喺大雨滂沱下再戰，終於贏番一鋪，重相約遲兩個月再較高下。
蘭西
電郵地址：
