非典型肺炎爆發令特區政府同港人面對前所未有嘅考驗，經濟雪上加霜，每日最心噏係聽到又有沙士（ＳＡＲＳ）病人死亡，同埋新增患者數字。
呢段抗炎日子，令市民大眾團結咗。近日多座公共屋邨相繼響應全城清潔運動，大舉清洗樓宇走廊同公眾地方，有居民事後同大使講，最開心當日唔少街坊去完街返嚟參與清潔行動，好多平時見面連招呼都冇打嘅鄰居，竟然可以熟絡起來，人與人之間嘅距離拉近咗。
蘋果日報慈善基金做咗咁多年慈善事業，得到咁多廣大讀者支持，抗炎行動點少得我哋。
基金喺第一輪行動中，已撥款一百萬元購買逾二萬份內附口罩、梘液同漂白水嘅抗炎包，透過社聯分發畀社會上大批老弱同窮困家庭。基金下一步行動，會主力援助沙士病人家屬同死者遺孤，早兩日基金就第一時間派人接觸到淘大花園Ｅ座三名肺炎死者嘅家屬，向佢哋提供緊急經濟援助，以解燃眉之急，嚟緊我哋會繼續全力以赴幫啲有需要的病患者、康復者以及死者嘅家庭，如果你知道他們真有困難，請撥個電話畀我哋。
全城抗炎硬仗，有賴每一位有心市民參與，慷慨解囊，好讓一眾受沙士影響嘅苦主度過困境。
暖流熱線
電話：29908688
傳真：23702192
電郵：
網址：