咪以為日本啲水着女星只係識得冧麻甩佬，其實佢哋都好in㗎，好似MEGUMI咁，近排除咗同班YellowCab姊妹踩入PlayStation2電玩界之外，佢重殺入日本潮流地帶裏原宿，幫名牌時裝店Sequen'擔任店長。
MEGUMI早排就喺裏原宿嘅Sequen'HARAJIKUHEADSHOP現身，慶祝呢個時裝品牌成立一周年，順便出任一日店長，雖然MEGUMI當日冇着泳衣，但係佢一身街頭服打扮，畀人煥然一新嘅感覺，in到同蒲開裏原宿嘅潮流人士有得揮！
雖然MEGUMI曾經俾人話平日鍾意大蝦細擺阿姐款，但嗰日佢喺間舖入面同啲店員打成一片，表現得老友鬼鬼，佢重好識得向啲客sell新貨，見到有客人即刻會叫人「隨便睇隨便揀」，又主動出擊，將啲衫披上客人身上推銷一番，睇落相當熟手。
嗰日MEGUMI亦親自將Sequen'一周年紀念特別版T恤同cap帽遞畀一早排隊搶購嘅客仔，佢重幫男fans戴帽，搞到人哋緊張到硬晒！