樂隊Beyond噚晚喺紅館舉行尾場演唱會，其實每晚都有好多朋友嚟捧佢哋場。前晚Beyond成員黃家強嘅兩位舊愛林珊珊同甄楚倩都有去睇騷，陳見飛、江欣燕、陳思慧、余文樂、關心妍、原子鏸同男友鄧健泓都有到場。
林珊珊大前晚同前晚都有捧家強場，甄楚倩前晚就同好友江欣燕一齊坐喺第一行。Beyond表演時，家強都不時會喺甄楚倩前面經過，但甄楚倩全晚就好鬼cool，就算有記者主動同佢打招呼，佢都完全冇反應。
而Beyond另一成員葉世榮前晚突然喺台上多謝已故女友許韻珊，佢話：「佢雖然喺天堂，但因為佢畀我勇氣，令我可以勇敢面對。」黃貫中面對熱情歌迷就有感而發咁話：「我冇話要賺大錢，只希望香港有人記得有隊rockband叫Beyond。」
吳文忻噚日一身女鬼打扮，喺九龍城啟德舊機場拍攝有線劇集《靈異偵緝檔案》。吳文忻今次會客串兩集，重一人分飾兩角㖭。由於《靈》劇拍攝以嚟，唔少工作人員喺啟德都聽過一啲怪聲，所以吳文忻扮女鬼時都自備護身符。佢重話以前見過一次靈異嘢，當時嚇到喊起上嚟，搞到成晚都瞓唔着。
韓國女星宋慧喬同李秉憲拍完韓劇《今年》之後，人氣更上一層樓。噚日有當地報章指宋慧喬獲香港片商垂青，被邀演出《夕陽天使》第二集同《火拼時速》第三集，更有傳港商力邀宋慧喬同李秉憲以情侶檔合演港產片，不過一切都係初步計劃，仍未落實。
近日成為內地「熊貓」手機代言人嘅梁朝偉，早排接受訪問時話自己有份參演嘅電影《英雄》同《無間道》有咁好嘅成績，佢都覺得好光榮。偉仔又話電影《2046》短期內會拍晒，重愈拍愈有感覺，所以好期待呢部戲上映。
陶喆最近為麥當勞作咗隻叫《我喜歡》嘅主題曲，佢重會親自主唱。早前陶喆就去咗上海拍呢首歌嘅MV，原來拍攝當日天氣好凍，陶喆着咗件好薄嘅衫，不過佢好有專業精神，仍落力同一班小朋友又唱又跳。據知當年張學友唱麥當勞主題曲有成百幾二百萬港幣酬勞，相信陶喆今次收入會更好。
