沙士疫情稍退，加上美股生性，港股估計短期反覆向好。上周五恒指收8808，預料短期內有機會上試9000，但唔易即時升破。
可以吼低買恒指Call輪，對象以交投旺，溢價唔太離譜者為主，例如9723、9767同9809等。有啲恒指Call輪，溢價好高，槓桿率好大，撞啱恒指如果升二三百點，佢哋嘅升幅會非常勁，不過個市如果唔對辦，佢哋散起上嚟，揸家亦會輸得好慘，唔係一般人啱炒嘅。
滙豐（005）5月起佔恒指成份股比重增加，恒指基金要按比例增購，估計增購行動好快完成。個市若繼續好，滙豐升幅可能比唔上其他藍籌。電訊股就可能跑贏滙豐。
中移動（941）現價15.85元，唔貴，相關Call輪要昅吓，對象有9768、9770同9773。3隻Call輪都係9月到期，有啲溢價高啲，但槓桿率亦稍大。
個市若然轉勢，和黃（013）會成為火車頭之一，留意揸啲相關Call輪，正路穩陣對象係9811，想搏殺則揀9765，呢件溢價高啲，槓桿率又大好唔多，贏輸幅度勁啲。
同系長實（001），都會跟和黃做好啲，啲輪一般溢價都好高，短炒對象有9764、9671同9680。
章盛