非典型肺炎令政府有趁火打劫嘅機會，二十三條快車愈開愈快，完全聽唔到民間叫停嘅聲音。八方噚日去沙田新城市廣場，就聽到有人為二十三條拗到火紅火綠，原來係一場大專辯論賽，辯題係「國家安全條例草案對言論自由的限制是合理的」，不過今次正反雙方唔係民建聯同民主黨，而係城大同浸大嘅同學仔。
做正方嘅城大，經常開口埋口都話反方「無知」，睇條文「睇啲唔睇啲」，而反方浸大就攞約翰奈斯堡原則嚟講，雙方都有板有眼。台上炮火隆隆，台下評判包括有份草擬二十三條立法條文嘅毛錫強，而肥仔李華明、劉江華、蔡素玉同港台戴健文，就刻意叫自己唔好太投入辯題，只睇同學仔嘅表現。
結果辯論賽反方好漂亮咁贏咗，可惜到實戰嘅立法會，反對派想贏政府？發夢冇咁早。
傳真︰2623-9278
電郵︰