讀者老譚投訴本欄五月一日畀錯料，佢當日睇完本欄話余仁生有「抗毒補肺丸」賣，立即走去沙田新城市廣場余仁生，夥計話：「見都未見過，對唔住。」跟住老譚又去旺角，同樣冇貨。老譚問：「左丁山你係唔係亂咁寫？」唔係噃，老友，根據秘書小姐嘅線人回報，尖沙嘴余仁生喺四月三十日有貨出售，每人限買五包（每包內藏四袋藥丸，唔係沖劑）；或者因為需求太大，趕唔切全線一起發售啦。
中大中醫中藥研究所所長梁秉中教授送來字條，說明呢次研製中藥，冇得到醫管局資助，馬會捐款五億元支持嘅「中藥研究所」又拿不定主意幫手，可幸得到其他人幫忙（中大校友齊關心基金、會計師），成本已有着落。讀者繼續寫信畀左丁山，話願意捐錢，為免阻延大家，請你哋傳真去2603-5248找梁教授或者馮國榮博士。
又有好多讀者寫電郵嚟討論「戴唔戴口罩」，幾乎一面倒支持戴口罩，看來「後非典」（Post-Sars）嘅香港人社會行為已有重大改變。一位讀者唔高興英童學校（喬治五世KGV）復課後，好多學生唔戴口罩，外籍老師全部唔戴，飯堂職工亦冇戴口罩，佢想向教統局投訴。呢個就係問題所在嘞，外國專家對戴口罩防「非典」嘅效用有疑問，影響到外國人嘅行為，所以同香港人嘅認知有衝突，世衞組織專家唔鼓勵戴口罩，香港醫生話要去抗議！呢位讀者嘅子弟就讀KGV，如果唔願意入鄉隨俗，咪吩咐自己細路戴囉！