留響屋企食得多又瞓得多，但又少出街做運動，豈非個個變晒肥仔肥女？咁又未必，好似Gary就非常醒目，給他找到各項球類運動迷你版，索性將屋企變成運動場，不但可以同個精力過盛的細佬來一場家居版NBA，更可以同他的Honey甜蜜溫馨打保齡。數落剛好有7款，可以玩足一星期，重可以當做運動KeepFit！
記者：招佩珊
攝影：陳盛臣 ImageKid：蔡豪軒
Model：Gary、Sugar（SunSpot）
籃球遊戲$199.9（a）
酷愛球類運動的Gary近期少了機會落場打波，一日唔打過波都會唔安樂的他，個心經已囉囉攣，加上近日正值NBA季後賽同英格蘭超級聯賽，令他的打波同踢波癮即時大爆發，就連他的奀皮細佬軒軒亦愈睇愈投入，當兩兄弟排排坐睇NBA籃球賽時，軒軒重話要學個米高佐敦玩入樽。Gary原來有好計，三兩下手勢就砌了個籃球架出來，隨即同細佬加開一場兩人對壘的屋企NBA。
入樽話咁易
個籃球架最高可伸高到62吋，這個高度對於Gary來說玩投籃就最適合，身高只得3呎多少少的細佬要入樽就極有難度，好在籃球架可伸縮，縮到最矮的46吋就啱晒細佬，而Gary就惟有要扮小矮人，最後更因為要扮矮而跌倒，被細佬有機可乘兼入埋樽！
不過，只見兩兄弟揸住個籃球通屋走，唔多覺有拍球動作，原來所謂籃球只是沒有彈力的膠波仔一個，唔可以好似真籃球那樣彈地，不過，若然肯走肯避跑勻全屋，運動量極高。
足球連龍門$30（b）
打完籃球似乎重未滿足，好！兩兄弟再來一場足球賽，屋頭踢到屋尾，追波都追到幾近斷氣。不過，Gary一定唔可以做守門員，皆因龍門實在太細，上半身已可以擋住全個龍門，軒軒又點入波？
棒球套裝$99.9（a）
另外，棒球的運動量亦奇高，無他，經常打唔中，要走勻間屋四個角落去執波！
網球$43.9（a）
為了應付奀皮細佬，Gary已經打到有點攰，不過，有救星，皆因他的女友Sugar到埗，於是Gary交了個「波」畀Honey，等女友陪軒軒繼續打。
打網球，難度唔算高，經常球來球往，執波的機會唔算太多，夠慳力！而且個網球是海綿做，唔怕打痛對方或打爛屋企嘅擺設，夠安全。不過像真度就真係唔多高，陪小朋友玩尚可。
乒乓球$89.9（a）
響張只有60×30cm的枱仔上打乒乓球，難度勁高，所謂的運動量就在於打出界要執波，玩「滴滴仔」問題不大，但Gary最終都忍唔住要殺波，結果就當然係經常要四圍趴底搵波。
高爾夫球$89.9（a）
其實呢套高爾夫球的外形相當可愛，細佬咁鍾意其實都有道理，拉住球袋去打Golf，都幾型㗎。
保齡球$38（b）
數到運動量最低就非保齡球同高爾夫莫屬，只需擺擺姿勢，稍稍郁動便可。Gary霸住套高爾夫球響軒軒面前大讚好玩，重扮作唔畀其他人玩，好勝的軒軒當然要搶住玩埋一份，阿哥就扮輸讓給細佬自己打。其實，這是Gary的苦肉計，這樣便可支開細佬，有機會二人世界「碌齡」，Gary就是這樣好Sweet好Sweet地，執住女友Sugar的手教她打保齡球的姿勢。
店舖資料
（a） 玩具反斗城（27309462）地址：尖沙嘴海運大廈地庫032
（b） 金輝玩具（23903337）地址：旺角弼街73號地下